جعلی سفری دستاویزات پر بیرون ملک سے آنے والا مسافر گرفتار

ایف آئی اے امیگریشن نے کراچی ایئرپورٹ پر جعلی سفری دستاویزات پر بیرون ملک سے آنے والے مسافر کو گرفتار کرلیا ہے۔ گرفتار ملزم محمد حسن فلائٹ نمبر OD135 کے ذریعے پاکستان پہنچا تھا۔ ملزم کے پاسپورٹ پر چائنا کا جعلی ویزا لگا ہوا تھا۔ ملزم کا تعلق حیدرآباد سے ہے۔

ترجمان ایف آئی اے کے مطابق ملزم کے پاسپورٹ پر آمد و روانگی کی جعلی مہریں لگی ہوئی تھیں، مذکورہ اسٹمپس کے حوالے سے سسٹم میں کسی قسم کا ریکارڈ موجود نہ تھا۔ ملزم کے پاسپورٹ پر عمان کی بھی جعلی آمد و روانگی کی مہریں پائی گئیں۔

ابتدائی تفتیش کے مطابق ملزم نے 2200 ملائیشین رنگٹ کے عوض ایجنٹ سے مذکورہ ویزا اور جعلی مہریں لگوائیں۔ ملزم کو بعد ازاں مزید قانونی کارروائی کے لیے اینٹی ہیومن ٹریفکنگ سرکل کراچی منتقل کر دیا گیا ہے۔