صدر آصف زرداری سے اردنی سفیر کی ملاقات، اردن میں ہونے والی غزہ کانفرنس میں شرکت کی دعوت

صدر مملکت آصف علی زرداری سے پاکستان میں اردن کے سفیر ڈاکٹر مُعن عبدالفتاح الخريسات نے ملاقات کی اور انہیں اپنے ملک میں غزہ کے حوالے سے ہونے والی کانفرنس میں شرکت کی دعوت دی جو قبول کر لی گئی۔

اردنی سفیر ڈاکٹر مُعن نے صدر مملکت کو 11 جون کو اردن میں غزہ میں انسانی امداد پر ہونے والی کانفرنس میں شرکت کی دعوت دی جسے صدر مملکت نے قبول کرتے ہوئے یقین دہانی کرائی کہ پاکستان کی جانب سے اس کانفرنس میں شرکت کی جائے گی۔

اس موقع پر صدر مملکت نے کہا کہ پاکستان اور اردن کے مابین قریبی برادرانہ تعلقات ہیں اور ان تعلقات کو مزید مستحکم بنانے کی ضرورت ہے۔

انہوں نے اردنی سفیر سے کہا کہ پاکستان، اردن کے ساتھ مل کر مختلف شعبوں میں تعاون کو فروغ دینے کا خواہاں ہے۔

ڈاکٹر مُعن عبدالفتاح الخريسات نے بتایا کہ اردن نے فلسطین میں انسانی امداد کی فراہمی کے لیے اخوت فاؤنڈیشن کے ساتھ مفاہمتی یادداشت پر دستخط کیے ہیں۔ صدر مملکت نے فلسطین میں امداد پہنچانے میں اردن کی کاوشوں کو سراہا اور کہا کہ پاکستان، اردن کی ان کاوشوں کی مکمل حمایت کرتا ہے۔

اس موقع پر اردن کے سفیر نے شاہ اردن کی جانب سے صدر آصف علی زرداری کو صدر منتخب ہونے پر مبارکباد کا پیغام بھی پہنچایا۔