قومی اسمبلی میں 2 مزید ارکان نے رکنیت کا حلف اٹھایا۔ ڈپٹی اسپیکر قومی اسمبلی سید غلام مصطفیٰ شاہ نے زینب محمود بلوچ اور علی قاسم گیلانی سے رکنیت کا حلف لیا۔ بعد ازاں ملک عامر ڈوگر نے تحریک پیش کی کہ وقفہ سوالات کی کارروائی ملتوی کی جائے، ایوان کی منظوری کے بعد وقفہ سوالات کی کارروائی ملتوی کردی گئی۔
مزید پڑھیں
چیئرمین سینیٹ سید یوسف رضا گیلانی نے قومی اسمبلی کے اجلاس کی کارروائی دیکھی۔ چیئرمین سینیٹ اسپیکر کی مہمانوں کے لیے مختص گیلری میں موجود رہے، ڈپٹی اسپیکر سید غلام مصطفیٰ شاہ نے انہیں خوش آمدید کہا اور ارکان نے بھی ڈیسک بجا کر ان کا خیر مقدم کیا۔
بجٹ میں نوجوانوں کو امید دلانے کی ضرورت ہے، سید علی قاسم گیلانی
پاکستان پیپلز پارٹی کے نو منتخب رکن قومی اسمبلی سید علی قاسم گیلانی نے کہا ہے کہ بجٹ میں نوجوانوں کو امید دلانے کی ضرورت ہے، ملک میں آئی ٹی ایمرجنسی نافذ کی جائے۔ ان کا کہنا تھا کہ یہ میرے والد سید یوسف رضا گیلانی کی نشست ہے، ملتان کے عوام نے جھوٹے پراپیگنڈے اور نفرت کی سیاست کے بجائے ترقی اور خوشحالی کے راستہ کو چنا ہے، ہم اپنے حلقہ کی آواز اٹھاتے رہیں گے۔
