سراج الحق نے ملک میں مارشل لا کا خدشہ ظاہر کردیا،سیاسی قوتوں کو مذاکرات کی تجویز

امیر جماعت اسلامی پاکستان سراج الحق نے ملک میں مارشل لا کا خدشہ ظاہرکرتے ہوئے کہا ہے کہ اب ہم اسی سمت بڑھ رہے ہیں اس لیے پی ڈی ایم حکومت اور تحریک انصاف کو ہوش کے ناخن لینے چاہییں۔

منصورہ میں پریس کانفرنس کرتے ہوئے سراج الحق نے سیاسی جماعتوں کو تجویز پیش کی کہ تمام سیاسی قوتیں انتخابات کے لیے مذاکرات کریں،حکومت کو تحریک انصاف کے جلسے میں رکاوٹیں نہیں ڈالنی چاہییں۔

سراج الحق کا کہنا تھا کہ پی ڈی ایم اور تحریک انصاف والے جھوٹ بولتے ہیں، اس وقت پورا سسٹم صرف ڈھکوسلا اور حکومت سرخی پا ؤڈر ہے ،ملک کے اندر ہر بحران میں مافیا ملوث ہے۔

امیر جماعت اسلامی پاکستان سراج الحق نے عمران خان کو منصورہ میں رہائش کی پیشکش کرتے ہوئے کہا ہے کہ پی ٹی آئی چیئرمین اگر اپنے گھر زمان پارک اور آزادکشمیر جہاں ان کی حکومت ہے وہاں پر محفوظ نہیں ہیں تو منصورہ آجائیں یہاں ان کی جان کو کوئی خطرہ نہیں ہوگا۔

الیکشن کمیشن نے ملک کو آئینی بحران میں مبتلا کردیا ہے

سراج الحق نے کہا کہ موجودہ حکومت ناکام ہوچکی ہے اور الیکشن کمیشن نے ملک کو آئینی بحران میں مبتلا کردیاہے،اب ضروری ہے کہ پورے ملک میں ایک ساتھ الیکشن کرائے جائیں۔

امیر جماعت اسلامی پاکستان نے کہا کہ پنجاب کی نگران حکومت پی ڈی ایم کا حصہ بن چکی ہے اور یہ لمبے عرصے کا پروگرام بنا رہے ہیں جبکہ الیکشن کمیشن نے ملک کو آئینی بحران سے دوچار کردیا ہے،اگر سپریم کورٹ کا حکم نہ مانا گیا تو یہ بغاوت ہوگی۔

ان کا کہنا تھا کہ ہر گھر میں مہنگائی کے باعث آگ لگی ہوئی ہے،زرعی ملک میں موت سستی اور آٹا مہنگا ہوچکا ہے،قوم کی بد بختی ہے کہ آٹے کے لیے قطار میں لگی ہوئی ہے۔

انہوں نے کہا کہ کہ سرکار خود تسلیم کرتی ہے کہ ملک میں 46 فیصد مہنگائی ہے اور ایک کروڑ 40 ہزار افراد ڈپریشن کا شکار ہوچکے ہیں۔