پاکستان تحریک انصاف کے رہنما فواد چودھری نے کہا ہے کہ لاہور سے لوگوں کو اٹھا کر مِسنگ پرسن بنایا جا رہا ہے۔ اظہر مشوانی اور شاہد حسین مِسنگ پرسنز ہیں۔ تین دن سے وہ لاپتا ہیں ان کا کچھ پتا نہیں، یہ ہرگز قابل قبول نہیں۔ لاہور جلسے نے نگران حکومت اور کابینہ کے لوگوں کے منہ پر تھپڑ رسید کیا ہے۔
لاہور میں اسد عمر، مسرت چیمہ اور اعظم سواتی کے ہمراہ پریس کانفرنس میں فواد چودھری نے کہا کہ مینار پاکستان جلسے کے بارے میں اہل لاہور کے لیے شکریہ کا لفظ چھوٹا ہے۔ تین ہزار چھاپے اور دو ہزار گرفتاریاں کی گئیں۔ لاہور کو کنٹینرز سے بند کر دیا گیا، اس کے باوجود لاکھوں لوگ جلسے میں پہنچے۔
فواد چودھری نے کہا یوں لگتا ہے کہ نازی پاکستان پر حکومت کر رہے ہیں۔ عالمی برادری میں پاکستان بارے تشویش پائی جاتی ہے، پاکستان کے عوام کی بے عزتی برداشت نہیں۔ جس طرح حکومت چل رہی ہے یہ پاکستان کو دوبارہ فیٹف کی لسٹ میں شامل کروائیں گے۔ حکمران پاکستان پر عالمی پابندیاں لگوانے کی طرف جارہے ہیں۔
رہنما تحریک انصاف نے کہا ’وزیر داخلہ رانا ثنا اللہ کہہ رہے ہیں کہ یا عمران خان نہیں یا ہم نہیں۔ ہم رانا ثنااللہ کی طرح نہیں سوچتے۔ زرداری صاحبان نے بھٹوز کو تو ویسے ہی ختم کر دیا۔ بلاول کو اپنے نانا کے اصولوں کا کچھ خیال نہیں۔ حکمران اتنے خوفزدہ ہیں کہ انہوں نے آئین کو ختم کر دیا ہے۔
فواد چودھری کا کہنا تھا شہباز نے جو خط لکھا ہے اس سے اندازہ لگا لیں کہ وہ کتنے چھوٹے آدمی ہیں۔ صدر نے تو وزیراعظم کو آئین پر عمل کا مشورہ دیا تھا۔ وزیراعظم نے بے ہودہ جواب دیا لگتا ہے کسی نے پریس ریلیز لکھ کر دی۔ جنرل باجوہ نے ایک سچ بولا ہے کہ شہبازشریف بغیر سر اٹھائے ڈانٹ سنتے ہیں۔
فواد چوہدری کے مطابق ملک میں آئینی حکومت زیادہ دور نہیں، عوام سپریم کورٹ کے ساتھ کھڑے ہیں۔ عمران خان قومی ایجنڈے کے تحت آگے بڑھ رہے ہیں۔ عمران خان کا راستہ روکنے کی ہر کوشش کی جا رہی ہے۔
اس موقع پر رہنما تحریک انصاف اسد عمر نے کہا کہ آنے والا ہفتہ پاکستان کی تاریخ کے لیے اہم موڑ ثابت ہوگا۔ پاکستا ن کی عدلیہ 1950 والی عدلیہ نہیں۔ سپریم کورٹ آئین کے ساتھ کھڑی نظر آئے گی۔
اسد عمر نے کہا کہ جس طرح ملک چلانے کی کوشش کی جا رہی ہے حالات تباہی کی طرف جا رہے ہیں۔ ملک فسطائیت کی طرف جا رہا ہے۔ تحریک انصاف نے سپریم کورٹ سے رجوع کر لیا ہے۔ ملک الیکشن کی طرف جائے گا۔ پی ٹی آئی ٹکٹ کے امیدوار انتخابی مہم جاری رکھیں۔
