ٹی20 ورلڈ کپ 2024 کے 31ویں میچ میں جنوبی افریقہٖ نے نیپال کو ایک رن سے ہرا دیا۔ ویسٹ انڈیز کے شہر کنگسٹن میں کھیلے گئے میچ میں فتح کے بعد جنوبی افریقہ سپر8 مرحلے میں پہنچ گیا ہے۔
نیپال نے جنوبی افریقہ کیخلاف ٹاس جیت کر پہلے فیلڈنگ کا فیصلہ کیا تو جنوبی افریقہ نے پہلے بیٹنگ کرتے ہوئے 7 وکٹوں کے نقصان پر 115 رنز اسکور کیے۔ ریزا ہینڈریکس نے 43 رنز ٹرسٹن اسٹبز نے 27، مارکرم 15 اور ڈی کوک 10 رنز بناسکے۔
نیپال کی جانب سے کوشل بھڑتل نے 4 جبکہ ڈیپندرا سنگھ نے 3 وکٹیں حاصل کرکے جنوبی افریقہ کو بڑا ہدف دینے سے روکنے میں خاطر خواہ کامیابی حاصل کی۔
جنوبی افریقہ کے 116 رنز کا ہدف حاصل کرنے کے لیے نیپال کے اوپنر آصف شیخ نے شاندار بیٹنگ کرتے ہوئے 49 گیندوں پر 1 چھکے اور 4 چوکوں کی مدد سے 42 رنز کی اننگز کھیلی۔ انیل شاہ 27، کوشل بھڑتل 13 اور سومپل کامی 8 رنز بنا سکے، نیپالی بلے بازوں نے جنوبی افریقہ جیسی مظبوط بولنگ لائن کے خلاف بہترین کھیل کا مظاہرہ کیا اور میچ کو سنسنی خیز بناتے ہوئے مقابلہ آخری گیند تک لے گئے۔
جنوبی افریقہ کے تبریز شمسی نے 19 رنز دے کر 4 کھلاڑیوں کو آؤٹ کیا جبکہ اینرخ نوکیا اور ایڈن مارکرم نے ایک ایک وکٹ حاصل کی۔ تبریز شمسی اپنی بہترین کارکردگی کی بدولت مین آف دی میچ قرار پائے۔
3 میچز میں کامیابی کے ساتھ جنوبی افریقہ کی ٹیم سپر 8 مرحلے کے لیے کوالیفائی کرچکی ہے جبکہ نیپال کا ورلڈ کپ میں سفر اس شکست سے قبل ہی اختتام پذیر ہوچکا ہے۔
