محکمہ داخلہ پنجاب نے صوبے بھر کی جیلوں کو 100 فیصد محفوظ بنانے کے لیے جدید کیمرے نصب کرنے کا فیصلہ کیا ہے، جیلوں کے ایک ایک انچ کو کیمروں کی کوریج میں لایا جائے گا۔
سیکریٹری داخلہ پنجاب نور الامین مینگل کی زیر صدارت جیل ریفارمز کمیٹی کا اجلاس ہوا، جس میں آئی جی جیل خانہ جات میاں فاروق نذیر، ایڈیشنل سیکریٹری جیل خانہ جات عاصم رضا اور متعلقہ سینیئر افسران نے شرکت کی۔
مزید پڑھیں
اجلاس میں فیصلہ کیا گیا کہ صوبے کی تمام جیلوں کے دفاتر، قیدیوں کی بیرکس، سیکیورٹی وال، جیمرز ایریا، کچن، اسپتال، لائبریری اور سب راستے سرویلنس میں آئیں گے، تمام پنجاب کی 43 جیلوں میں 4500 جدید کیمرے نصب ہوں گے۔
ہائی سکیورٹی زون کی طرز پر جیلوں کے تمام مقامات کیمروں کی مانیٹرنگ میں ہوں گے، کیمروں کی تنصیب سے جیل میں کی جانے والی ہر حرکت سرویلنس میں آئے گی، نئے نصب کیے جانے والے کیمرے آرٹیفیشل انٹیلیجنس ٹیکنالوجی سے لیس ہوں گے۔
محکمہ داخلہ کے مطابق مانیٹرنگ کے لیے تمام جیلوں، آئی جی جیل آفس اور محکمہ داخلہ میں کنٹرول روم قائم کیے جائیں گے۔
