پیٹرول کی قیمت میں کمی کے باوجود ٹرانسپورٹ کے کرایوں میں کمی نہ ہونے پر وزیراعلیٰ پنجاب مریم نواز شریف نے برہمی کا اظہار کیا ہے اور متعلقہ حکام کو ٹرانسپورٹ کرایوں میں کمی کے لیے آپریشن شروع کرنے کی ہدایت کردی ہے۔
ہفتے کے روز وزیراعلیٰ پنجاب مریم نوازشریف نے چھٹی والے دِن بھی اجلاس بلالیا، اجلاس میں صوبائی سیکریٹریز ، پولیس اور انتظامیہ کے اعلیٰ حکام کی شرکت کی۔
مزید پڑھیں
پیٹرول کی قیمت میں 35 روپے کمی کے باوجود ٹرانسپورٹ کرایوں میں کمی نہ ہونے پر وزیراعلیٰ نے اجلاس میں وزارت ٹرانسپورٹ کے حکام پر برہمی کا اظہار کیا، وزیراعلیٰ نے ہدایت کی ہے کہ وزیراعظم شہبازشریف کے پیٹرول میں کمی کا بڑا ریلیف کرایوں میں کمی کی صور ت میں عوام تک پہنچایا جائے۔
وزیراعلیٰ نے وزارت ٹرانسپورٹ اور پولیس کو ٹرانسپورٹ کرایوں میں فوی کمی کے لیے آپریشن شروع کرنے کی ہدایت کی ہے، وزیراعلیٰ پنجاب نے معائنہ کمیشن کو بھی اس بابت فوری اقدامات کی ہدایات کی ہیں۔
وزیراعلیٰ مریم نواز شریف نے متعلقہ حکام کو خبردار کیا ہے کہ روٹی، کرائے سمیت دیگر اشیاءکی قیمتوں کو سرکاری نرخوں پر قائم رکھنے کو یقینی بنایا جائے، اس ضمن میں کوتاہی برداشت نہیں کی جائے گی۔
عیدالاضحیٰ پر الائشوں کی بروقت صفائی
وزیراعلیٰ پنجاب نے عید الضحی پر الائشوں کی بروقت صفائی، مویشی منڈیوں میں جانوروں کو دھوپ سے بچاﺅ کے لیے شیڈز بیوپاریوں کو شیڈز فراہم کرنے کی بھی ہدایت کی ہے۔
عوام میں تھیلے تقسیم
پہلی بار32 لاکھ خصوصی تھیلے بھی عوام میں تقسیم کرنے کا آغاز کردیا گیا ہے، حکومت کے فراہم کردہ پلاسٹک سے پاک تھیلوں میں عوام قربانی کا گوشت تقسیم کرسکیں گے۔
مویشی منڈیوں میں سہولیات کی فراہمی
مریم نواز شریف نے متعلقہ حکام کو مویشی منڈیوں میں ڈاکٹرز کی فراہمی اور پانی سمیت دیگر ضروری سہولیات کی دستیابی یقینی بنانے کی ہدایت کی ہے، انہوں نے ہدایت کی ہے کہ بڑی عید پر صفائی کا معیار وہی ہونا چاہیے جو وزیراعلیٰ شہبازشریف کے دور میں تھا۔
نہروں پر لائف گارڈز کی تعیناتی
وزیراعلیٰ پنجاب نے تعطیلات کے دوران صوبے کی نہروں پر عوام کی جان کی حفاظت کے لیے لائف گارڈز کی تعیناتی کی بھی ہدایت کی ہے۔
ٹریفک کا مؤثر پلان
وزیراعلیٰ نے ٹریفک کا مؤثر پلان بنانے اور عوام کو ٹریفک جام سے بچانے کے لئے اقدامات کرنے کی بھی ہدایت کی ہے، انہوں نے گزشتہ روز ٹھوکر نیاز بیگ پر شدید ٹریفک جام کا بھی سخت نوٹس لیا اور متعلقہ حکام پر برہمی کا اظہار کیا، اور انہیں وارننگ دی کہ دوبارہ ایسی صورتحال پیدا نہ ہو۔
صوبے بھر میں امن وامان یقینی بنایا جائے
وزیراعلیٰ پنجاب نے صوبے بھر میں امن وامان یقینی بنانے کے لئے بھی سخت اقدامات کی ہدایت کی ہے، اجلاس میں خطاب کرتے ہوئے مریم نواز نے کہا کہ تعطیلات کے دوران بھی تمام صورتحال کی ذاتی طورپر نگرانی کروں گی۔
