وفاقی وزیر برائے مذہبی امور چوہدری سالک حسین کا وادی منیٰ میں موجود پاکستانی مکاتب کا دورہ، منیٰ کے خیموں میں سہولیات کا جائزہ اور حجاج کرام سے ملاقات۔
وفاقی وزیر برائے مذہبی امور چوہدری سالک حسین نے وادی منیٰ میں موجود پاکستانی مکاتب کا دورہ کیا۔ اس موقع پر انہوں نے منیٰ میں موجود پاکستانی خیموں میں سہولیات کا جائزہ لیا اور حجاج کرام سے ملاقات کی۔
مزید پڑھیں
اس دوران جب کہ منیٰ میں سخت گرمی پڑ رہی تھی، چوہدری سالک کے دورے کے دوران موسم خوشگوار ہوگیا اور بارش شروع ہوگئی، جس پر حجاج کرام کے چہرے خوشی سے کھل اٹھے اور وہ خیموں سے باہر نکل آئے۔
قبل ازیں وفاقی وزیر برائے مذہبی امور چوہدری سالک حسین نے پاکستانی حجاج کرام سے اپیل کی تھی کہ وہ اپنی حفاظت کے پیش نظر سعودی حکام کی ہدایات پر سختی سے عمل کریں۔ سخت موسم کے پیش نظر رمی جمرات کے لیے شام 4 بجے کے بعد روانہ ہوں۔ وزیر مذہبی امور نے یہ بیان سعودی نسک ایپ سے آج جاری ہونے والی ہیلتھ ایڈوائزری کے تناظر میں دیا۔
اس سلسلے میں چوہدری سالک حسین نے پاکستان حج مشن ہسپتال کو بھی خصوصی انتظامات کی ہدایت جاری کی تھیں اور کہا تھا کہ ہیٹ اسٹروک سے بچاؤ کے لیے پیرامیڈیکل سٹاف پر مشتمل خصوصی ٹیمیں تشکیل دی جائیں اور مشن ہسپتال میں ہنگامی انتظامات کیے جائیں۔
