وفاقی وزیر داخلہ محسن نقوی نے سابق سینیٹر مشتاق احمد خان سے ملاقات کی ہے جس کے بعد اسلام آباد میں 41 روز سے جاری سیو دی غزہ دھرنا ختم کرنے کا اعلان کردیا گیا۔
وفاقی وزیر داخلہ محسن نقوی نے مشتاق احمد سمیت دیگر عہدیداروں سے ملاقات کی اور کہاکہ فلسطین کے حوالے سے جو جذبات آپ کے ہیں وہی ہر پاکستانی کے ہیں اور ہمیں آپ کے مطالبے پر بھی کوئی اعتراض نہیں۔
اسلام آباد میں 41 روز سے جاری سیو غزہ دھرنا ختم،وفاقی وزیرداخلہ محسن نقوی کی ذاتی کاوشوں سے 41 روز سے اسلام آباد میں جاری سیو غزہ دھرنا ختم،سابق سینیٹر مشتاق احمد خان کی سبراہی میں سیو غزہ کمپین کے عہدیداروں کی وزیر داخلہ محسن نقوی ، سیکرٹری داخلہ و دیگر سے ملاقات،فلسطین کیلئے ہر… pic.twitter.com/qi9TLutmrZ
— Hussain Ahmed Ch (@HussainAhmedCh8) June 22, 2024
محسن نقوی نے کہاکہ دھرنے کے دوران ناخوشگوار واقعے میں جو افراد جاں بحق ہوئے ہیں انہیں ضرور انصاف ملے گا۔
مطالبات پورے نہ ہوئے تو تمام آپشن کھلے ہیں، مشتاق خان
سابق سینیٹر مشتاق احمد نے وزیر داخلہ سے ملاقات کے بعد میڈیا سے گفتگو کرتے ہوئے کہاکہ محسن نقوی سے مذاکرات کے دوران 6 نکاتی مطالبات پر اتفاق ہوا ہے۔
انہوں نے کہاکہ وفاقی حکومت اسماعیل ہنیہ کو خط لکھ کر 40 ہزار فلسطینیوں کی شہادت پر پاکستان کی طرف سے تعزیت کرے گی اور اس میں اخلاقی حمایت کی بات بھی کی جائے گی۔
انہوں نے کہاکہ اس کے علاوہ اسلامی جمعیت طلبا کے کارکنوں پر مہم کے دوران جو ایف آئی آرز ہوئی ہیں وہ ختم کرنے بھی اتفاق ہوا ہے جبکہ ہمارے شہدا کو انصاف اور اہلخانہ کو معاوضہ دیا جائے۔
مشتاق احمد نے کہاکہ اگر ہمارے مطالبات پر عمل نہ کیا گیا تو پھر تمام آپشن کھلے ہیں۔
سابق سینیٹر نے کہاکہ وفاقی حکومت نے 6 مطالبات تسلیم کرنے کی یقین دہانی کرائی ہے، جن پر عملدرآمد کی کوشش کریں گے۔
