سپریم کورٹ: عمران خان کی نااہلی کے خلاف زیر التوا اپیل کی جلد سماعت کے لیے درخواست دائر

بانی پاکستان تحریک انصاف (پی ٹی آئی) عمران خان نے اپنی نااہلی کے خلاف زیر التوا اپیل کی جلد سماعت کے لیے سپریم کورٹ میں درخواست دائر کر دی۔ بانی پی ٹی آئی کے وکیل علی ظفر کی جانب سے درخواست دائر کی گئی۔

وکیل علی ظفر کی جانب سے دائر کردہ درخواست میں استدعا کی گئی کہ عمران خان کی نااہلی کے خلاف اپیل کو جلد سماعت کے لیے مقرر کیا جائے۔ مقدمات کی وجہ سے عمران خان پارٹی چیئرمین اور ممبر اسمبلی منتخب نہیں ہو پا رہے۔

درخواست میں موقف اپنایا گیا کہ درخواست گزار سابق وزیراعظم اور سب سے بڑی سیاسی جماعت کا سربراہ ہے جبکہ درخواست گزار کو الیکشن کمیشن کی جانب سے نااہل کرنے کے بعد پارٹی سربراہ کے عہدے سے ہٹانے کی کارروائی جاری ہے۔

’الیکشن کمیشن کے احکامات کے خلاف اسلام آباد اور لاہور ہائیکورٹ میں مقدمات زیر التواء ہیں، سپریم کورٹ میں زیر التوا کیس کی وجہ سے ہائیکورٹس میں کارروائی آگے نہیں بڑھ پا رہی‘۔

درخواست گزار کے مطابق ان مقدمات کی وجہ سے درخواست گزار چیئرمین پی ٹی آئی اور ممبر اسمبلی منتخب نہیں ہو پا رہے جبکہ زیر التواء اپیل کی وجہ سے درخواست گزار ضمنی انتخابات میں حصہ بھی نہیں لے سکتے۔

واضح رہے بانی پی ٹی آئی عمران خان کی جانب سے اپنی نااہلی کے خلاف 10 جنوری 2024 کو سپریم کورٹ میں اپیل دائر کی گئی تھی، جس کی جلد سماعت کے لیے ایک اور درخواست دائر کی گئی ہے۔