راہل گاندھی لوک سبھا میں قائد حزب اختلاف مقرر

کانگریس کے رہنما راہل گاندھی بھارت کی لوک سبھا میں حزب اختلاف کے قائد بنادیے گئے اور اس حوالے سے لوک سبھا سکریٹریٹ نے نوٹیفکیشن بھی جاری کر دیا۔

بھارت کے سابق وزیراعظم راجیو گاندھی کے صاحبزادے اور اندرا گاندھی کے پوتے راہل گاندھی نے اپنے سوشل میڈیا پلیٹ فارم ’ایکس‘ پر ایک ویڈیو پیغام پوسٹ کیا ہے جس میں انہوں کہا کہ ملک کے عوام، کانگریس کارکنان اور انڈیا (بلاک) کے ساتھیوں کا مجھ پر بھروسہ ظاہر کرنے پر میں ان کا شکرگزار ہوں۔

انہوں نے عوام سے مخاطب ہوتے ہوئے کہا کہ اپوزیشن کا لیڈر صرف ایک عہدہ نہیں بلکہ یہ آپ کی آواز بن کر آپ کے مفادات اور حقوق کی جنگ لڑنے کی بہت بڑی ذمہ داری ہے۔

’میں آپ کا ہوں اور آپ کے لیے ہوں‘

راہل گاندھی نے کہا کہ ہمارا آئین غریبوں، محروموں، اقلیتوں، کسانوں، مزدوروں کا سب سے بڑا ہتھیار ہے اور ہم اس پر کیے گئے ہر حملے کا پوری طاقت سے جواب دے کر اس کی حفاظت کریں گے۔

پیغام کے آخر میں راہل گاندھی نے کہا کہ ’میں آپ کا ہوں اور آپ کے لیے ہی ہوں‘۔

راہل گاندھی کو حزب اختلاف کا لیڈر بنانے کا فیصلہ منگل کے روز ہی انڈیا بلاک کی میٹنگ میں کر لیا گیا تھا۔ کانگریس پارلیمانی پارٹی کی چیئرپرسن اور راہل گاندھی کی والدہ سونیا گاندھی نے اس حوالے سے 25 جون کو ہی لوک سبھا کے پروٹیم اسپیکر بھرتری ہری مہتاب کو خط لکھ کر مطلع بھی کیا تھا۔

بدھ کو لوک سبھا کے نومنتخب اسپیکر اوم برلا نے راہل گاندھی کو اپوزیشن لیڈر بنائے جانے سے متعلق باضابطہ منظوری دے دی۔

کمل ہاسن و دیگر کی مبارکباد

راہل گاندھی کے حزب اختلاف لیڈر بنائے جانے پر انہیں بڑی تعداد میں مبارکبادیں موصول ہوئیں۔

مشہور اداکار کمل ہاسن، کانگریس صدر ملکارجن کھڑگے، این سی پی ایس پی چیف شرد پوار، شیوسینا یو بی ٹی لیڈر سنجے راوت، تامل ناڈو کے وزیر اعلیٰ ایم کے اسٹالن سمیت کئی سیاستدانوں نے بذریعہ ’ایکس‘ راہل گاندھی کو حزب اختلاف لیڈر کا عہدہ ملنے پر اپنی نیک خواہشات کا اظہار کیا۔

یاد رہے کہ نریندر مودی کی جماعت بھارتیہ جنتا پارٹی (بی جے پی) نے مسلسل تیسری بار مرکز میں حکومت بنالی ہے تاہم اس بار مخالف اتحاد ’انڈیا‘ کی جانب سے پی جے پی سخت مقابلے کا سامنا کرنا پڑا۔