پاکستان تحریک انصاف کے باغی رہنما جہانگیر ترین کا گروپ ملکی سیاست میں ایک بار پھر متحرک ہوگیا ہے اور آئندہ کا سیاسی لائحہ عمل طے کرنے کے لیے سر جوڑ لیے ہیں۔
جہانگیر ترین کی سربراہی میں ہونے والے اعلیٰ سطح کے مشاورتی اجلاس میں اپوزیشن لیڈر قومی اسمبلی راجہ ریاض ،وزیراعظم کے معاون خصوصی عون چودھری ،نعمان لنگڑیال،اسحاق خاکوانی،اجمل چیمہ سمیت دیگر نے شرکت کی۔
اجلاس میں تحریک انصاف سے تعلق رکھنے والے نئے چہروں نے بھی شرکت کی اور بعد ازاں جہانگیر ترین نے گروپ ممبران کے اعزاز میں افطار ڈنر بھی دیا۔
میڈیا رپورٹس کے مطابق جہانگیر ترین گروپ نے ملکی سیاست میں دوبارہ فعال کردار ادا کرنے کا فیصلہ کیا ہے اور گروپ کے کچھ ارکان نے تحریک انصاف نظریاتی کے نام سے سیاسی شناخت بنانے کی تجویز دی ہے۔
جہانگیر ترین گروپ نے تحریک انصاف کے مزید ارکان اسمبلی اور رہنماؤں سے رابطوں کا فیصلہ کرتے ہوئے یہ طے کیا ہے کہ اب ملکی سیاست میں ہم اپنا بھرپور کردار ادا کریں گے۔
شرکاء کا کہنا تھا کہ عمران خان کی پالیسیوں نے تحریک انصاف کو تباہی سے دوچار کیا جس کے باعث بڑی تعداد میں لوگ پی ٹی آئی چیئرمین سے علیحدگی اختیار کرنا چاہتے ہیں۔
ذرائع کے مطابق جہانگیر ترین گروپ نے اندرونی مشاورت کو جاری رکھنے پر اتفاق کیا ہے اور ملکی سیاست پر نظر رکھتے ہوئے مزید مشاورتی اجلاس بھی کیے جائیں گے۔