راولپنڈی تھانہ نیو ٹاؤن پولیس نے ایک پولیس کانسٹیبل کے خلاف 9 مئی کی توڑ پھوڑ کے ملزمان سے چھینے گئے 33 موبائل فون سیٹ اور دیگر قیمتی سامان فروخت کرنے کے الزام میں مقدمہ درج کیا ہے۔ مدعی کی جانب سے درخواست دائر ہونے پر انسداد دہشت گردی کی عدالت (اے ٹی سی) کے جج ملک اعجاز آصف کے حکم پرمقدمہ درج کیا گیا۔
مزید پڑھیں
تفصیلات کے مطابق متعلقہ پولیس افسران نے مبینہ طور پر محکمانہ انکوائری کے بعد معاملہ چھپا دیا تھا، اس سے قبل مندرا پولیس نے بھی خزانے کے ایک کیس میں غبن کا ارتکاب کیا تھا۔ تاہم، یہ اپنی نوعیت کا ایک اور واقعہ سامنے آیا ہے جس میں شمس آباد پولیس اسٹیشن میں درج 9 مئی کو انٹیلی جنس دفتر پر حملے کے ملزمان نے پولیس پر الزام عائد کیا ہے کہ ان کے موبائل اور قیمتی سامان چوری ہوچکے ہیں۔
ایف آئی آر کے مطابق کانسٹیبل صداقت نے گرفتار ملزمان سے قیمتی موبائل فون اور دیگر اشیاء برآمد کرکے نیو ٹاؤن تھانے کی حدود میں واقع مقامی مارکیٹ میں فروخت کی تھیں۔ کئی اہم شواہد بشمول گاڑیوں کی رجسٹریشن بکس، برطانیہ کے ورک ویزا، قومی شناختی کارڈ، اور ملزمان کے بینک ڈیبٹ اور کریڈٹ کارڈز پولیس اسٹیشن میں جمع نہیں کروائے گئے۔
ذرائع کا کہنا ہے کہ 9 مئی کے مقدمات میں ملوث ملزم نے پولیس حکام کے سامنے شکایت درج کرائی، جس نے راول ڈویژن کے ایس پی کو معاملے کی انکوائری کرنے کے لیے کہا، تاہم افسران نے مبینہ طور پر معاملے کو چھپائے رکھا۔ اس کے بعد مدعی نے عدالت میں اپیل کی جس کے نتیجے میں پولیس کانسٹیبل کے خلاف مقدمہ درج کر لیا گیا۔
