ناشتہ ریڑھی پر کرتا ہوں پھر بھی گیس کا بل لاکھ روپے آیا، شیخ رشید احمد

سابق وفاقی وزیر شیخ رشید احمد نے کہا ہے کہ جب سے اسلامی دوست چلے پر لے گئے تھے تب سے گھر میں دوپہر کا چولہا نہیں جلا۔ ناشتہ ریڑھی پر کرتا ہوں صرف شام کو کھانا پکتا ہے گیس کا بل ایک لاکھ روپے آیا ہے۔

شیخ رشید احمد نے اپنے ویڈیو پیغام میں کہا ہےکہ اندرون شہر کے محلوں میں شہریوں کا گیس کا بل 6 سے 8 ہزار رپوے آیا ہے۔ ملک کے ذمہ داران سن لیں گلی محلوں میں اندھا انقلاب پرورش پا رہا ہے۔ لوگ بے بس ہو گئے ہیں حلق سے فلک تک مہنگائی نے زندہ دفن کر دیا ہے۔

ان کا کہنا تھا کہ ملک ڈوب رہا ہے اقتصادی معاشی اور سیاسی تباہی ہے، سمجھنے کی ضرورت ہے گاڑی ہاتھ سے چھوٹ رہی ہے وقت کسی کا نہیں ہوتا۔ چور ڈاکو لٹیرے اپنے کیس ختم کرانے آئے تھے غریب کا چولہا بجھا دیا ہے۔

شیخ رشید احمد نے مزید کہا کہ اب فارم 45 اور 47 کی لڑائی نہیں، غریب کے زندہ رہنے کی جستجو ہے۔ ذمہ دار حلقے خدا کے لیے غریب کو مرنے سے بچائیں۔ انہوں نے کہا کہ میرا بجلی کا بل ایک لاکھ 68 ہزار آیا ہے۔