استحکام پاکستان پارٹی (آئی پی پی) کے رہنما عون چوہدری نے کہا ہے کہ پی ٹی آئی نے عالمی سطح پر پاکستان کے خلاف لابی بنائی، ان کا مقصد ہے کہ ملک میں انتشار پھیلے اور آگ لگے، جو جو پاکستان کو تباہ کرنے کی سازش کرےگا اسے بے نقاب کروں گا۔
اسلام آباد میں پریس کانفرنس کرتے ہوئے عون چوہدری نے کہاکہ اقوام متحدہ کا ورکنگ گروپ اب ایکٹو ہوا ہے، یہ معاملہ 2016 سے شروع ہوا تھا جب پی آر کمپنی ہائیر کی گئی۔
یہ بھی پڑھیں عمران خان کی قید عالمی قوانین کی خلاف ورزی، فوری رہا کیا جائے، یو این ورکنگ گروپ
عون چوہدری نے کہاکہ دنیا میں پاکستان کے خلاف لابی بنائی گئی ہے، ہمیں معلوم ہے کہ لندن میں بیٹھے لوگوں کو پیسے کون دے رہا ہے۔
استحکام پاکستان پارٹی کے رہنما نے کہاکہ پہلے دو سال ڈراما رچایا گیا کہ ان کے خلاف سازش کردی گئی ہے، اور جب حقیقی معنوں میں امریکا نے مداخلت کی تو ہم نے قومی اسمبلی میں قرارداد لائی مگر انہوں نے مخالفت کردی۔
عون چوہدری نے کہاکہ عمران خان عدالتی فیصلوں کی وجہ سے جیل میں ہیں، پی ٹی آئی کے رہنماؤں کو کہنا چاہتا ہوں کہ مگرمچھوں کو بے نقاب کریں۔
یہ بھی پڑھیں امریکا میں لابنگ: تحریک انصاف کیا چاہتی ہے؟
انہوں نے ذلفی بخاری کو تنقید کا نشانہ بناتے ہوئے کہاکہ اگر آپ نے اپنے لیڈر کو رہا کرانا ہے تو پاکستان میں آؤ لندن کیوں بھاگ گئے ہو۔
آئی پی پی رہنما نے مزید کہاکہ پی ٹی آئی اپنے گریبان میں جھانکے اور سوچے کہ ان 4 سالوں میں ملک کو کہاں سے کہاں تک پہنچا دیا گیا۔ تحریک انصاف سانحہ 9 مئی اور جناح ہاؤس حملے پر معافی مانگے۔
