پاکستانی فلم وڈرامہ انڈسٹری کے معروف اداکار فواد خان کے نام سے کون واقف نہیں، ان کے مداح انھیں ایک ورسٹائل ایکٹر قرار دیتے ہیں جو مزاح، سنجیدہ اداکاری اور رومانس سب بخوبی نبھاتے ہیں۔ فواد خان نے نہ صرف پاکستان بلکہ بھارت میں بھی اپنی بہترین اداکاری کا لوہا منوایا اور سال 2014 میں بالی ووڈ فلم ’خوبصورت‘ میں کام کر کے سب کو اپنا دیوانہ بنالیا۔
فواد خان کے مداح ان کی ہندی فلموں میں واپسی کا انتظار کر رہے تھے اور تقریباً 8 سال بعد فواد خان ’اے دل ہے مشکل‘ کے بعد بالی ووڈ میں واپسی کے لیے تیار ہیں۔ فواد خان کو وانی کپور کے ساتھ ایک فلم میں کاسٹ کیا گیا ہے اور اس خبر نے فواد خان کے مداحوں کو خوش کر دیا ہے۔
فواد اور وانی کے نئے پراجیکٹ کی پروڈکشن جلد شروع ہونے والی ہے جس کی شوٹنگ لندن میں کی جائے گی جبکہ پراجیکٹ کی باقی تفصیلات کو فی الحال خفیہ رکھا جا رہا ہے۔
واضح رہے کہ فواد خان کو پاکستان ہی نہیں بلکہ بالی ووڈ اور ہالی ووڈ میں بھی مقبولیت حاصل ہے، وہ بھارتی فلم ’اے دل ہے مشکل‘ کے علاوہ ہالی ووڈ کی مارول کا بھی حصہ بن چکے ہیں۔ فواد خان نے 2014 میں بالی ووڈ فلم ’خوبصورت‘ میں ڈیبیو کیا تھا جس میں مرکزی اداکارہ سونم کپور تھیں۔ فلم ’خوبصورت‘ 2014 میں ریلیز ہوئی تھی اور اس فلم کے لیے انہیں فلم فیئر ایوارڈ سے بھی نوازا گیا تھا۔
حال ہی میں فواد خان اور اداکارہ صنم سعید کی بھارتی ویب سیریز ’برزخ‘ کا ٹیزر بھی ریلیز کردیا گیا ہے۔
