سابق کرکٹر اور چیف سلیکٹر صلاح الدین صلو نے چیئرمین پی سی بی سے سابق فاسٹ بولر اظہر محمود کو کرکٹ کے تمام فارمیٹس کے اسسٹنٹ کوچ کے عہدے سے ہٹانے کا مطالبہ کرتے ہوئے کہا ہے کہ اظہر اس کام کے اہل نہیں۔
حال ہی میں میڈیا سے گفتگو کرتے ہوئے صلاح الدین صلو نے کہا کہ جب بھی اظہر محمود کو پاکستان کرکٹ کی خدمت کا موقع ملا ہے ڈیلیور کرنے میں ناکام رہے۔
یہ بھی پڑھیں: نیوزی لینڈ کے خلاف ٹی20 سیریز: ٹیم منیجمنٹ کا اعلان، اظہر محمود ہیڈ کوچ مقرر
صلاح الدین صلو نے چیئرمین پی سی بی محسن نقوی کی پاکستان کرکٹ کو بحال کرنے کی کوششوں کی تعریف کرتے ہوئے کہا کہ وہ ان کاوشوں کو قدر کی نگاہ سے دیکھتے ہیں جو محسن نقوی پاکستان کرکٹ کو بین الاقوامی معیار کے مطابق لانے کے لیے کر رہے ہیں۔
انہوں نے ٹی 20 ورلڈ کپ میں پاکستان کی مایوس کن کارکردگی کے بعد محسن نقوی کے کئی اہم اقدامات کی بھی ستائش کی جن میں سلیکشن کمیٹی کی اصلاح کرنا، کھلاڑیوں کے اثر و رسوخ کو کم کرنا بنیادی ڈھانچے کو بہتر بنانا اور ڈومیسٹک کرکٹ میں شرکت کو تمام کھلاڑیوں کے لیے لازمی بنانا شامل ہیں۔
صلاح الدین صلو نے کہا کہ ٹی 20 ورلڈ کپ میں پاکستانی ٹیم کی ناقص کارکردگی کے بعد ایسے اقدامات ناگزیر ہو گئے تھے اور مجھے خوشی ہے کہ چیئرمین پی سی بی نے فوری ایکشن لیا اور ان اقدامات کے ثمرات سامنے آئیں گے۔
انہوں نے پی سی بی چئیرمین کو مشورہ دیا کہ وہ قومی ٹیم کے اسسٹنٹ کوچ اظہر محمود کی جگہ کسی زیادہ قابل فرد کو لے آئیں۔ انہوں نے مزید کہا کہ مجھے یاد ہے کہ کس طرح پی ایس ایل فرنچائز اسلام آباد یونائیٹڈ نے پی ایس ایل 8 سیزن کے دوران اظہر کو برطرف کیا گیا تھا جو اس بات کی غمازی کرتا ہے کہ وہ کھلاڑیوں کی حوصلہ افزائی کرنے یا ان کی کوتاہیوں پر قابو پانے میں ان کی مدد کرنے میں ناکام رہے۔
