تحریک لبیک پاکستان اور وفاقی حکومت کے درمیان مذاکرات کامیاب ہوگئے، ٹی ایل پی کی جانب سے دھرنا ختم کرنے کا اعلان کردیا گیا۔ رانا ثنا اللہ نے ٹی ایل پی رہنماؤں کو یقین دہانی کروائی کہ حکومت ہر فورم پر اسرائیل کی مذمت کرے گی، اور اسرائیلی مصنوعات کا بائیکاٹ کیا جائے گا اس حوالے سے ایک کمیٹی تشکیل دت دی گئی ہے۔
وزیر اعظم کے مشیر برائے سیاسی امور رانا ثنا اللہ، وفاقی وزیر اطلاعات عطا اللہ تارڑ، اسلام آباد انتظامیہ اور تحریک لبیک کے رہنماﺅں نے مشترکہ پریس کانفرنس میں دھرنا ختم کرنے پر اتفاق کیا گیا۔ تحریک لبیک کی جانب سے مذاکرات کی کامیابی پر دھرنا ختم کرنے کا اعلان کرتے ہوئے اپنے کارکنوں کو واپس جانے کی ہدایت کی گئی۔
مزید پڑھیں: ڈی آئی جی اسلام آباد کی ٹی ایل پی مظاہرین کے ساتھ نعرہ بازی
مشیر وزیر اعظم رانا ثنا اللہ نے کہا کہ تحریک لبیک فلسطین کے مظلوم مسلمانوں پر ہونے والے ظلم کے خلاف احتجاج پر موجود ہے، حافظ سعد رضوی کے فلسطین کے مظلوم مسلمانوں کی امداد اور اسرائیل کی مذمت کے حوالے سے مطالبات تھے، حکومت فلسطین کے مسلمانوں کی مدد کے لیے اپنی کاوشیں بلا تعطل جاری رکھے گی۔
رانا ثناءاللہ نے کہا کہ تحریک لبیک بھی ان کوششوں میں اپنی معاونت فراہم کریں گے، حکومت 31 جولائی سے پہلے فلسطین کے لیے امداد کی کھیپ روانہ کرے گی، ایک ہزار ٹن سے زائد خوراک اور دیگر امدادی سامان غزہ بھجوایا جائے گا، غزہ پر حملے کے بعد اسرائیل دہشت گرد ملک کے طور پر سامنے آیا ہے، اسرائیل جنگی جرائم کا مرتکب ہوا ہے، اسرائیل نے معصوم فلسطینیوں کو نشانہ بنایا ہے۔
مشیر برائے سیاسی امور کا کہنا تھا کہ نیتن یاہو دہشت گرد ہے، ہمارا اقوام عالم سے مطالبہ ہے کہ اسرائیل کو انصاف کے کٹہرے میں کھڑا کیا جائے، مسلم امہ سمیت پوری دنیا کو فلسطین میں مظالم بند کروانے کے لیے اپنا کردار ادا کرنے کی ضرورت ہے، اسرائیل سے متعلقہ مصنوعات اور پروڈکٹس اور اسرائیلی کمپنیوں کی مصنوعات کا بائیکاٹ کیا جائے گا، اس حوالے سے ایک کمیٹی تشکیل دے دی ہے۔ ٹی ایل پی کے دوستوں کے فلسطینی مسلمانوں کے ساتھ اظہار یکجہتی کے جذبے کو سراہتے ہیں۔
یہ بھی پڑھیں: تحریک لبیک کا فیض آباد دھرنا، جڑواں شہروں کے لوگ کیا کہتے ہیں؟
انہوں نے کہا کہ فلسطین کے مظلوم مسلمانوں پر ہونے والے مظالم کو روکنے کے لیے ہر فورم پر قدم اٹھائیں گے، فلسطین کے زخمیوں کے لیے ادویات بھیج رہے ہیں، فلسطینی طلبا پاکستان آنا چاہتے ہیں تو حکومت سہولت فراہم کرے گی، فلسطین پر ظلم میں جو قوتیں ملوث ہیں ان کی پرزور مذمت کرتے ہیں۔
رانا ثنا اللہ نے کہا کہ اس ظلم اور جبر کا مقابلہ کرنے کے لیے جس قسم کی امداد کرسکے کریں گے، ٹی ایل پی کے قائدین کا شکریہ ادا کرتے ہیں جنہوں نے اہم ایشو پر ہمیں الرٹ کیا ہے۔
