پاکستان تحریک انصاف (پی ٹی آئی) کے رہنما علی محمد خان نے کہا ہے کہ پی ٹی آئی خیبر پختونخوا اسمبلی توڑے گی نہ ہی قومی اسمبلی سے استعفیٰ دے گی۔
علی محمد خان نے اپنے بیان میں کہا ہے کہ فارم 47 والوں کے لیے میدان خالی نہیں چھوڑیں گے، لوٹا ہوا مینڈیٹ واپس لے کر حکومت بنائیں گے، جس کے وزیرِ اعظم بانی پی ٹی آئی ہوں گے۔
یاد رہے کہ گزشتہ روز جے یو آئی کے سربراہ مولانا فضل الرحمٰن نے اسلام آباد میں میڈیا سے گفتگو کے دوران دعویٰ کیا تھا کہ پی ٹی آئی نے کے پی اسمبلی توڑنے اور قومی و صوبائی اسمبلیوں سے مستعفیٰ ہونے کی یقین دہانی کروا دی ہے۔
پاکستان تحریک انصاف (پی ٹی آئی) کے چیئرمین بیرسٹر گوہر نے مولانا فضل الرحمٰن کے بیان کی تردید کی تھی۔ کہا تھا کہ تحریک انصاف نے مولانا فضل الرحمٰن سے اسمبلیاں تحلیل کرنے یا استعفوں پر کوئی بات نہیں کی۔
