وزیر دفاع خواجہ محمد آصف نے کہا ہے کہ پی ٹی آئی پر پابندی کا فیصلہ خارج از امکان نہیں۔ تاہم پی ٹی آئی پر پابندی کا فیصلہ اتحادی جماعتوں سے مشاورت سے ہو گا۔
پارلیمنٹ کے باہر صحافیوں سے گفتگو کرتے ہوئے خواجہ محمد آصف نے کہا کہ کابینہ میں پی ٹی آئی پر پابندی سے متعلق کوئی گفتگو نہیں ہوئی تاہم پی ٹی آئی پر پابندی کا فیصلہ خارج از امکان نہیں۔ اور پابندی کا فیصلہ اتحادی جماعتوں سے مشاورت سے ہوگا۔
وزیر دفاع نے کہا کہ پی ٹی آئی کی بھوک ہڑتال سمیت تمام فیصلے علامتی ہوتے ہیں۔ پی ٹی آئی کو کھانے پینے کی عادت ہے اس لیے بھوک ہڑتال کر رہے ہیں۔
جب خواجہ آصف سے پی ٹی آئی سے مذاکرات کی بابت پوچھا گیا تو انہوں نے کہا کہ پی ٹی آئی نے سیاست میں بات چیت کی گنجائش نہیں چھوڑی۔ یہ لوگ اپنے آفیشل پیج سے پاکستان اور پاکستان کے آرمی چیف کو گالیاں دیتے ہیں۔ سیاسی پارٹیاں اور سیاسی کارکنان ایسی حرکتیں اور باتیں نہیں کرتے۔
تحریک انصاف پر پابندی کے حوالے سے خواجہ محمد آصف کا کہنا تھا کہ کابینہ میں پی ٹی آئی پر پابندی سے متعلق کوئی گفتگو نہیں ہوئی، پی ٹی آئی پر پابندی کا فیصلہ اتحادی جماعتوں سے مشاورت سے ہو گا، تاہم پی ٹی آئی پر پابندی خارج از امکان نہیں۔
جب خواجہ محمد آصف سے پوچھا گیا کہ کیا پی ٹی آئی کے بھوک ہڑتالی کیمپ کے شرکاء سے بات چیت ہو گی؟ انہوں نے کہا ’ میں خیر سگالی کے طور پر کھانا بھجوا دیتا ہوں۔‘
