سوشل میڈیا پلیٹ فارمز پر رابطوں کے ذریعے نوجوان لڑکے لڑکیوں کو محبت ہوجانا معمول کی بات بن گئی ہے، اکثر خبریں نظر سے گزرتی ہیں کہ فلاں ملک کی دوشیزہ پاکستانی نوجوان کی محبت میں گرفتار ہوکر یہاں پہنچ گئی ہے، مگر دوسری جانب پاکستانی لڑکیوں نے بھی دوسرے ممالک میں جاکر شادیاں کرنا شروع کردی ہیں۔
سیما حیدر کے بعد اب ایک اور پاکستانی لڑکی جسے بھارتی نوجوان سے محبت ہوگئی تھی اس نے ہندوستان جاکر شادی رچا لی ہے۔
یہ بھی پڑھیں سیما حیدر اُدھر تو ’انجو‘ اِدھر، بھارتی خاتون اپنا پیار پانے پاکستان پہنچ گئی
میڈیا رپورٹس کے مطابق ہندوستان جاکر شادی کرنے والی پاکستانی لڑکی کا نام مہوش ہے جس نے بھارتی ریاست راجستھان کے چورو ضلع سے تعلق رکھنے والے رحمان نامی شخص سے شادی کی۔
بھارتی میڈیا کا کہنا ہے کہ رحمان اور مہوش کا رابطہ ’امو‘ نامی سوشل میڈیا پلیٹ فارمز کے ذریعے آن لائن ہوا تھا، جہاں سے بات آگے بڑھتی گئی۔
یہ بھی یاد رہے کہ اس سے قبل سیما حیدر اور سچن کا رابطہ بھی پب جی گیم کے ذریعے تھا، تاہم سیما حیدر غیرقانونی طور پر ہندوستان پہنچ گئی تھی جبکہ مہوش نے قانونی طریقے واہگہ بارڈر کراس کیا۔
یہ بھی پڑھیں سیما حیدر کے معاملے میں بھارتی قونصلر رسائی کا انتظار ہے، دفتر خارجہ
یہاں ایک اہم بات یہ بھی ہے کہ سیما حیدر نے غیرمسلم نوجوان سے شادی کی تھی، جبکہ مہوش اور رحمان ایک ہی مذہب سے تعلق رکھتے ہیں۔
مہوش کی اس سے قبل بھی شادی ہوئی تھی، تاہم وہ اپنے شوہر سے طلاق لے چکی ہیں، جبکہ رحمان نے بھی بیوی کو چھوڑ دیا ہے اور دونوں کے 2،2 بچے ہیں۔
