ملک کو آئی پی پیز کے چنگل میں ن لیگ نے پھنسایا، عمر ایوب

قومی اسمبلی میں اپوزیشن لیڈر عمر ایوب نے کہا ہے کہ ملک کو آئی پی پیز کے چنگل میں پاکستان مسلم لیگ (ن) نے پھنسایا۔

اسلام آباد ہائیکورٹ کے باہر میڈیا سے گفتگو میں انہوں نے کہا کہ کیپیسٹی چارجز کے مہنگے معاہدوں پر ن لیگ نے خود دستخط کیے۔

یہ بھی پڑھیں: آئی پی پیز سی پیک کی طرح اہم معاہدے، کسی صورت ختم نہیں کر سکتے، اویس لغاری

انہوں نے کہا کہ دنیا میں بجلی کی پیداواری لاگت کم جبکہ ہمارے ہاں زیادہ ہے، ہم نے اپنے دور میں آئی پی پیز معاہدوں پر نظرثانی کی۔

پی ٹی آئی رہنما عمر ایوب نے کہا کہ ہم نے آئی پی پیز کے لیے ڈالر ریٹ 175 روپے پر فکس کیا، قطرکے ساتھ ایل این جی معاہدے پرنظرثانی کی اور 10 ارب ڈالر سے زائد بچائے۔

’5 اگست کو صوابی میں بڑا جلسہ ہوگا‘

انہوں نے کہا کہ سابق نگران وزرا اب کیوں مگرمچھ کے آنسو بہا رہے ہیں، سابق نگران حکومت کو ہمارے پیچھے ویگو ڈالے لگانے سے فرصت ہی نہ تھی، یہ لوگ پہلے پیزے اور پیسٹریاں کھانے میں مصروف تھے۔

یہ بھی پڑھیں: آئی پی پیز کو ادا کی جانے والی رقم پاکستان کے دفاعی بجٹ سے بھی زیادہ کیسے ہوئی؟

عمرایوب نے کہا کہ اینٹی کرپشن ہمارے ساتھیوں کے پیچھے پڑی ہوئی ہے، مصدق ملک نے غیر سنجیدہ آفر کی ہے، ان کے اپنے گھر میں فارم 47 پر لڑائی ہورہی ہے، مذاکرات کے لیے حکومت کے پلے کچھ بھی نہیں، وزرا کے ہوش اُڑے ہوئے ہیں، یہ آپس میں دست وگریباں ہیں۔

ان کا مزید کہنا تھا کہ تحریک انصاف 5 اگست کو صوابی میں بڑاجلسہ کرے گی جبکہ دھرنے کےحوالے سے کورکمیٹی فیصلہ کرے گی۔