ایل پی جی کی قیمت میں اضافہ، اوگرا نے نوٹیفکیشن جاری کردیا

آئل اینڈ گیس ریگولیٹری اتھارٹی (اوگرا) کی جانب سے مائع پیٹرولیم گیس (ایل پی جی) کی قیمتوں میں اضافہ کردیا گیا۔

اوگرا کی جانب سے ایل پی جی کی قیمتوں میں اضافے کا نوٹیفکشین جاری کیا گیا ہے، جس کے مطابق یکم اگست سے ایل پی جی کی فی کلو قیمت میں 2 روپے 27 پیسے اضافہ ہوجائے گا۔

یہ بھی پڑھیں اوگرا نے ایل پی جی سلنڈرز کی خرید و فروخت پر پابندی کیوں عائد کی؟

نوٹیفکیشن کے مطابق قیمتوں میں اضافے کے بعد ایل پی جی کی فی کلو قیمت 236 روپے 99 پیسے ہوگی۔

اوگرا کی جانب سے جاری نئی قیمتوں کے مطابق گھریلو سلنڈر 26 روپے 90 پیسے مہنگا ہوگیا ہے۔

نوٹیفکیشن میں کہا گیا ہے کہ ایل پی جی کا 11.8 کلو کا گھریلو سلنڈر کا 2 ہزار 769 روپے 56 پیسے کا ملے گا۔

ایل این جی کی قیمتوں میں کمی

دوسری جانب اوگرا کی جانب سے ایل این جی کی قیمتوں میں کمی کا اعلان کیا گیا ہے۔

نوٹیفکیشن کے مطابق سوئی ناردرن کے لیے ایل این جی کی قیمت میں 1.23 ڈالر فی ایم ایم بی ٹی یو کمی کی گئی ہے جس کے بعد ایل این جی کی قیمت 13.39 ڈالر فی ایم ایم بی ٹی یو ہوگئی۔

یہ بھی پڑھیں ایل این جی کی قیمت میں کمی کا اعلان، اصل وجہ کیا ہے؟

اسی طرح اوگرا نے سوئی سدرن کے لیے ایل این جی قیمت میں 1.22 ڈالرفی ایم ایم بی ٹی یو کمی کردی ہے جس کے بعد ایل این جی کی قیمت 13.15 ڈالر فی ایم ایم بی ٹی یو ہوگئی ہے۔