محمد شیراز گلگلت بلتستان سے تعلق رکھنے والے ایک ننھے وی لاگر ہیں۔ انہیں اپنے گاؤں کی وی لاگنگ کے ذریعے پہچان ملی تھی اور عمدہ وی لاگز کی وجہ سے لاکھوں کی تعداد میں لوگ ان کے سبسکرائبرز تھے جن کی تعداد یوٹیوب پر 1.69 ملین ہے۔
یہ بھی پڑھیں: ’میں آج سے وی لاگ نہیں بناؤں گا‘، محمد شیراز نے وی لاگنگ کو خیرباد کیوں کہا؟
شیراز کی بہن مسکان کو بھی مداح پسند کرتے ہیں۔ شیراز کو اگر سابق وی لاگر کہا جائے تو وہ بھی کچھ غلط نہیں ہوگا کیوں کہ انہوں نے مئی 2024 میں اپنے والد کے کہنے پر وی لاگنگ ترک کردی تھی۔ اس موقعے پر شیراز نے اپنی ایک ویڈیو کے ذریعے اعلان کیا تھا کہ ’میرے ابو نے کہا ہے کہ اب کچھ عرصہ یہ ویڈیوز بنانا بالکل ختم کردو اور صرف پڑھائی پر توجہ دو‘۔
تاہم شیراز نے حال ہی میں ایک وی لاگ اپ لوڈ کیا ہے جس کی وجہ یہ ہے کہ ان کے گاؤں کو اس کی اشد ضرورت تھی۔اپنے وی لاگ میں انہوں نے اپنے گاؤں میں سیلاب کی حالیہ صورتحال کے حوالے سے اپنے خدشات کا اظہار کیا ہے۔
یہ بھی پڑھیے: ننھے شیراز کو والد نے وی لاگنگ سے کیوں روکا؟ تفصیلات سامنے آگئیں
اپنی ویڈیو میں شیراز نے کہا کہ ناظرین ہم سیلاب سے متاثر ہوئے ہیں اور ہماری فصلیں اب سیلاب میں ڈوبی ہوئی ہیں اور اگر مخالف سمت سے بارش ہوئی تو سب کچھ ڈوب جائے گا۔
شیراز نے کہا کہ جب میں وزیر اعظم شہباز شریف سے ملا تھا تو میں نے ان سے پانی کے چھوٹے ذخائر بنانے کی بات کی تھی تاکہ ہم سیلاب سے بچ سکیں۔
انہوں نے کہا کہ براہ کرم پانی کے چھوٹے ذخائر بنانے میں ہماری مدد کی جائے۔ انہوں نے مزید کہا کہ میں وزیراعظم پاکستان سے بھی اپیل کرتا ہوں کہ وہ ہماری مدد کریں۔
