جماعت اسلامی کا بجلی کے بھاری بلوں اور مہنگائی کے خلاف دھرنا راولپنڈی کے بعد کراچی میں بھی شروع ہوگیا ہے۔ گورنر کامران ٹیسوری کی جانب سے کیے گئے وعدے کے مطابق دھرنے میں پکوڑے نہ ملنے پر جماعت اسلامی کے کارکنان گورنر ہاؤس کے گیٹ پر پہنچ گئے۔
حکومت سندھ کی جانب سے ریڈزون میں دفعہ 144 کے نفاذ کے باوجود جماعت اسلامی کے کارکنوں نے امیر جماعت اسلامی کراچی منعم ظفر کی قیادت میں دھرنا دے رکھا ہے۔
یہ بھی پڑھیں گورنر سندھ نے بھی جماعت اسلامی کے دھرنے کی حمایت کردی
واضح رہے کہ چند روز قبل گورنر سندھ کامران ٹیسوری نے جماعت اسلامی کے دھرنے کی حمایت کرتے ہوئے کہا تھا کہ مہنگائی کے خلاف دھرنے کی حمایت کرتا ہوں، اگر جماعت اسلامی کے کارکنان گورنر ہاؤس کے باہر دھرنا دیتے ہیں تو پکوڑوں کے علاوہ کھانے پینے کا بندوبست بھی کروں گا۔
آج جب جماعت اسلامی کے کارکنوں نے گورنر ہاؤس کے باہر دھرنا دیا اور گورنر کی جانب سے وعدے کے مطابق انہیں پکوڑے نہ ملے تو وہ گیٹ پر پہنچ گئے اور گھنٹا بجا کر سوال کیاکہ گورنر کی جانب سے دھرنا شرکا کو پکوڑے کھلانے کا اعلان کیا گیا تھا، تو وہ پکوڑے کدھر ہیں۔
واضح رہے کہ جماعت اسلامی کے زیراہتمام راولپنڈی کے لیاقت باغ میں حافظ نعیم الرحمان کی قیادت میں دھرنا جاری ہے، اور انہوں نے حکومت کو 10 مطالبات پیش کیے ہیں۔
یہ بھی پڑھیں جماعت اسلامی کا دھرنا جاری، حکومت کو پیش کیے گئے 10 مطالبات سامنے آگئے
حکومت اور جماعت اسلامی کے درمیان مذاکرات کے دو دور ہوچکے ہیں، مگر اب تک معاملات آگے نہیں بڑھ سکے۔ حافظ نعیم الرحمان نے اعلان کررکھا ہے کہ اگر حکومت نے سنجیدگی نہ دکھائی تو پورے ملک میں دھرنے شروع کردیں گے۔
