سپریم کورٹ آف پاکستان نے 13جون کو مارگلہ ہلز نیشنل پارک میں موجود تمام ریسٹورنٹس پر پابندی عائد کردی، اور 3مہینوں کے اندر اندر ریسٹورنٹس کو ختم کرنے کا حکم دیا۔ تاہم، مونال انتظامیہ نے آج ریسٹورنٹ کو 11 ستمبر 2024 تک مکمل بند کرنے کی تاریخ دیتے ہوئے اپنے تمام چاہنے والوں کا شکریہ ادا کیا۔
سوشل میڈیا پر ایک پوسٹ کے ذریعے مونال انتظامیہ نے ریسٹورنٹ کے مکمل بند ہونے کی تاریخ کا اعلان کیا اور لکھا کہ آپ کے اعتماد کے لیے اور ہمیں اپنی بہترین صلاحیتوں کے مطابق آپ کی خدمت کرنے کا موقع فراہم کرنے، ہمیں پہچان، تعریف اور آپ کے دل میں جگہ دینے کے لیے آپ کا بہت شکریہ۔
مزید پڑھیں: سپریم کورٹ کا مونال سمیت نیشنل پارک میں قائم تمام ریسٹورنٹس بند کرنے کا حکم
مونال انتظامیہ نے لکھا کہ 2006 کے بعد سے مونال کے لیے پاکستان اور اس کے خوبصورت لوگوں کی ایک مثبت انداز میں خدمت اور نمائش کرنا بے حد خوشی کی بات ہے۔ یہ سفر ہم سے وابستہ ٹیم کے لیے کامیابی کی کہانیوں اور جذبات سے بھرا ہوا تھا لیکن اب الوداع کہنے کا وقت ہے، جوکہ واقعی بہت مشکل ہے۔
واضح رہے سپریم کورٹ نے 13جون جمعرات کو مونال سمیت نیشنل پارک میں قائم تمام ریسٹورنٹس بند کرنے کا حکم دیا۔ سپریم کورٹ نے حکم دیا کہ نیشنل پارک میں قائم ریسٹورنٹس 3ماہ میں مکمل ختم کیے جائیں، نیشنل پارک سے باہر کہیں بھی لیز مقصود ہو تو متاثرہ ریسٹورنٹس کو ترجیح دی جائے۔
یہ بھی پڑھیں: مونال ریسٹورنٹ سے متعلق کیس کا تحریری فیصلہ جاری
انہوں نے حکم دیا کہ نیشنل پارک میں کمرشل سرگرمیوں کی اجازت نہیں دی جا سکتی۔ دوسری جانب مونال ریسٹورنٹ نے رضاکارانہ طور پر 3ماہ میں ریسٹورنٹ منتقل کرنے کی یقین دہانی بھی کروا دی تھی۔
