وفاقی دارالحکومت اسلام آباد میں ناجائز تعلقات کے شبہ میں ایک جواں سالہ لڑکے اور ایک شادی شدہ خاتون کو ذبح کردیا گیا۔
پولیس کے مطابق، واقعہ تھانہ ترنول کی حدود میں واقع گاؤں پنڈ پڑیاں میں پیش آیا، جہاں خیبرپختونخوا کے ضلع ہنگو سے تعلق رکھنے والے ایک نوجوان اور شادی شدہ خاتون کو بے دردی سے قتل کیا گیا۔
یہ بھی پڑھیں: خاتون سے اجتماعی زیادتی، شوہر کے ناجائز تعلقات کا خمیازہ ؟
خاتون کی شناخت مردانہ بی بی جبکہ لڑکے کی شناخت شعیب کے نام سے ہوئی ہے۔ پولیس نے بتایا ہے کہ مقتول لڑکا خاتون کا رشتہ دار تھا، خاتون نے لڑکے کی جانب سے ہراساں کیے جانے کے حوالے سے اپنے دیور سے اس کی شکایت بھی کی تھی۔
پولیس کے مطابق، ملزمان خاتون کی شکایت پر اسلام آباد آئے تھے، ملزمان جب پہنچے تو دونوں مقتولین نازیبا حالت میں پائے گئے، ملزمان نے پہلے لڑکے کو مارا، اس کے بعد خاتون کو قتل کیا۔
یہ بھی پڑھیں: بالائی سندھ: 24 جانیں نگل جانے والی قبائلی جنگ کیسے ختم ہوئی؟
ملزمان نے وارادات سے قبل ٹیکسلا سے کرائے پر گاڑی بک کرائی تھی، پولیس نے گاڑی اور ڈرائیور کو بھی تحویل میں لے لیا ہے۔ ملزمان قتل کی واردات کے بعد فرار ہوگئے تھے۔
ملزمان نے پولیس سے رابطہ کرکے لڑکے اور خاتون کے قتل کا اعتراف کیا ہے، ڈرائیور کا کوئی قصور نہیں، ہماری روایات کے مطابق قتل بنتا تھا جو ہم نے کیا۔
ایس ایس پی آپریشن ارسلان شاہ زیب نے کہا ہے کہ پولیس کی جانب سے لاشوں کو اسپتال منتقل کر دیا گیا ہے، ملزمان کو جلد از جلد گرفتار کیا جائے گا۔
