نائب وزیراعظم و وزیر خارجہ اسحاق ڈار نے او آئی سی کے سیکریٹری جنرل سے ملاقات کی ہے اور اس بات پر زور دیا ہے کہ غزہ میں فوری جنگ بندی سمیت فلسطینیوں کو بلا روک ٹوک امداد کی فراہمی یقینی بنائی جائے۔
ترجمان دفتر خارجہ کے مطابق وزیر خارجہ اسحاق ڈار اور او آئی سی کے سیکریٹری جنرل حصین براہیم طحہ کے درمیان ملاقات جدہ میں او آئی سی کی ایگزیکٹو کمیٹی کے غیر معمولی اجلاس کے موقع پر ہوئی۔
یہ بھی پڑھیں نئی سرد جنگ کا خوف پوری دنیا کو ڈرا رہا ہے، نائب وزیر اعظم اسحاق ڈار
ممتاز زہرا بلوچ نے کہاکہ ملاقات میں فلسطین اور مقبوضہ کشمیر کی صورتحال پر تبادلہ خیال کیا گیا۔
ترجمان نے بتایا کہ ملاقات میں فلسطینیوں کی جاری نسل کشی اور مغربی کنارے میں سنگین انسانی صورتحال پر باتی چیت ہوئی۔ اسحاق ڈار نے مشرق وسطیٰ میں قیام امن کے لیے او آئی سی کی کوششوں کی تعریف کی۔
ترجمان دفتر خارجہ نے کہاکہ وزیر خارجہ اسحاق ڈار نے او آئی سی کے اقدامات کے لیے پاکستان کی مکمل حمایت کا اظہار کیا۔
اسحاق ڈار نے جموں و کشمیر پر او آئی سی رابطہ گروپ اور خصوصی ایلچی کے کشمیریوں کے جائز حق خودارادیت کی حمایت کرنے کے لیے تاریخی کردار کو سراہا۔
ممتاز زہرا بلوچ نے کہاکہ ملاقات میں اسلامو فوبیا، امتیازی سلوک اور مسلمانوں کے خلاف تشدد پر بھی تبادلہ خیال کیا گیا۔
یہ بھی پڑھیں پاکستان فلسطین میں فوری غیر مشروط جنگ بندی کا مطالبہ کرتا ہے، وزیر اعظم شہباز شریف
ممتاز زہرا بلوچ کے مطابق وزیر خارجہ نے اسلامو فوبیا پر او آئی سی کے سیکریٹری جنرل کے خصوصی ایلچی کی تقرری کو بھی سراہا۔
اسحاق ڈار نے کہاکہ امید ہے خصوصی ایلچی اسلامو فوبیا کے اہم مسئلے کو حل کرنے کی مہم کو آگے بڑھائیں گے۔
