پیرس کے بعد لاس اینجلس میں منعقد ہونے والے 2028 کے سمر اولمپکس میں کرکٹ سمیت مزید 5 کھیل شامل کرنے کا اعلان کیا گیا ہے، بین الاقوامی اولمپک کمیٹی (آئی او سی) نے ایونٹ کے شیڈول میں اہم تبدیلیاں کرتے ہوئے اگلے اولمپکس میں 5نئے کھیلوں کے لیے تجاویز کی منظوری دی ہے۔
تفصیلات کے مطابق ان کھیلوں میں سے کچھ کھیل ایسے بھی ہیں جن کو 100سال سے زیادہ عرصے سے گیمز میں نہیں دیکھا گیا ہے۔ تاہم، ان 5کھیلوں کی 2028 کے لاس اینجلس اولمپکس کے لیے باضابطہ طور پر منظوری دے دی گئی ہے۔
کرکٹ
مقبول ترین کھیل کرکٹ 1900 میں اولمپکس میں صرف ایک بار نمودار ہوا جس کے بعد اب 2028 میں شاندار واپسی کرے گا۔ لاس اینجلس میں کھیلا جانے والا کرکٹ فارمیٹ ٹی20 کی طرز کا ہوگا۔
اسکواش
اسکواش بھی 2028 میں اپنا اولمپک ڈیبیو کرے گا، جو اس سے قبل بیونس آئرس میں 2018 کے یوتھ اولمپک گیمز میں ایک مظاہرے کے کھیل کے طور پر سامنے آیا تھا۔
بیس بال/سافٹ بال
بیس بال اور سافٹ بال 2028 میں اولمپکس میں 2ایونٹس کے ساتھ ایک مشترکہ کھیل کے طور پر واپس آئیں گے، مردوں کے لیے بیس بال اور خواتین کے لیے سافٹ بال ہوگا۔ تاہم، ان تقریبات کی میزبانی لاس اینجلس میں نہیں بلکہ اوکلاہوما سٹی میں کھیلوں کی موجودہ سہولیات کو بروئے کار لاتے ہوئے کی جائے گی۔
تاریخی طور پر، بیس بال صرف مردوں کا کھیل تھا اور سافٹ بال صرف خواتین کا ایونٹ تھا، لیکن انہیں ٹوکیو 2020 اولمپکس میں ملایا گیا تھا۔
فلیگ فٹ بال
فلیگ فٹ بال جو 5 ٹیموں میں کھیلا جاتا ہے، 2028 میں مردوں اور خواتین کے دونوں ڈویژنوں میں اپنا اولمپک آغاز کرے گا۔ امریکی پرچم والی فٹ بال خواتین کی ٹیم موجودہ عالمی چیمپئن ہے، جب کہ میکسیکو نے ٹیم امریکا کو شکست دے کر 2022 کے عالمی کھیلوں میں ٹائٹل اپنے نام کیا تھا۔
لیکروس
لیکروس تاریخ میں تیسری بار لیکروس سکسز کی شکل میں اولمپکس میں واپس آئے گا، جو اس کا ایک تیز رفتار ورژن ہے۔ یہ کھیل پہلے 1904 اور 1908 کے اولمپک کھیلوں میں نمودار ہوا تھا۔ ورلڈ لیکروس کے صدر سیو ریڈفرن نے 2028 کے اولمپکس میں اس کی شمولیت کو اس کھیل کے لیے ایک اہم کامیابی قرار دیا۔
بریک ڈانسنگ
بریک ڈانس جس نے 2024 کے پیرس اولمپکس میں اپنا آغاز کیا، لاس اینجلس میں نہیں دکھایا جائے گا۔ کھیل شائقین کی توجہ حاصل کرنے میں ناکام رہا ہے۔
باکسنگ
اگرچہ اس بارے میں ابھی باضابطہ طور پر کوئی فیصلہ سامنے نہیں آیا لیکن عالمی گورننگ باڈی کی کمی کی وجہ سے باکسنگ 2028 کے لاس اینجلس گیمز سے باہر ہونے کا خطرہ ہے۔
