چیئرمین تحریک انصاف عمران خان نے قانون کی حکمرانی اور آئین کی بالادستی کے لیے تمام سیاسی جماعتوں و سول سوسائٹی سے رابطے کا ٹاسک عمران اسماعیل اور حلیم عادل شیخ کو سونپ دیا۔
سندھ اسمبلی میں قائد حزب اختلاف حلیم عادل شیخ اور سابق گورنر سندھ عمران اسماعیل نے زمان پارک میں عمران خان سے اہم ملاقات کی ہے۔
ملاقات میں عمران خان کا کہنا تھا کہ موجودہ صورتحال میں عدلیہ پر حملہ کو روکنے کے لئے پوری قوم کو متحد کرنا ناگزیر ہوگیا ہے۔آئین کی بالادستی کے لیے پر عزم تمام سیاسی جماعتوں سے رابطہ کیا جائے۔
ملاقات کے بعد حلیم عادل شیخ کا کہنا تھا کہ انہیں سیاسی جماعتوں سے رابطہ کی ذمہ داری سونپی گئی ہے۔ سندھ کی سیاسی، مذہبی، قوم پرست جماعتوں اور سول سوسائٹی سے بھی رابطہ کیا جائے گا۔
’آئین کی بالادستی اور رولز آف لاء کے لئے پوری قوم کو اکھٹا ہونا ہوگا۔‘
