تحریک انصاف کے اسلام آباد جلسے کے لیے خیبر پختونخوا میں تیاریوں کو حتمی شکل دے دی گئی ہے، اور وفاقی حکومت کی جانب جلسہ روکنے کی ممکنہ کوششوں اور رکاوٹوں کو ختم کرنے لیے بھی انتظامات کیے جاچکے ہیں۔
رکاوٹوں کو ہٹانے کے لیے کرین تیار
تحریک انصاف کی صوبائی اور ضلعی قیادت جلسے کی تیاریوں میں مصروف ہے، ذرائع نے بتایا کہ وزیر اعلیٰ نے تمام اراکین قومی و صوبائی اسمبلی کو ہدایت کی ہے کہ اپنے اپنے حلقوں سے بڑی تعداد میں کارکنان کو نکالیں اور خود بھی قافلوں میں شامل ہوکر ورکرز کے ساتھ نکلیں۔ صوبائی وزیر برائے اعلیٰ تعلیم مینا خان آفریدی نے میڈیا کو بتایا کہ تمام تر تیاریاں مکمل کرلی گئی ہیں اور صوبے سے کارکنان ہر صورت جلسہ گاہ پہنچیں گے۔
مزید پڑھیں: این او سی مل گیا، 22 اگست کو ہر حال میں جلسہ کریں گے، بیرسٹر گوہر
انہوں نے بتایا کہ جلسے کی اجازت ملی ہے لیکن اس کے باوجود بھی رکاوٹیں کھڑی کرکے قافلوں کو روکنے کی کوشش کی گئی تو اس کے لیے پلان تشکیل دے دیا گیا ہے، اور ہر قسم کی رکاوٹوں کو ہٹانے کے لیے کرین ساتھ لے کر جا رہے ہیں، اور کارکنان بھی پرعزم ہیں۔
خیبرپختونخوا سے اسلام آباد تک میری گاڑی سب سے آگے ہوگی، علی امین گنڈاپور
جلسے کی تیاریوں کے حوالے سے وزیر اعلیٰ کی سربراہی میں اجلاس ہوا، جس میں تیاریوں کا جائزہ لیا گیا۔ وزیر اعلیٰ علی امین گنڈاپور نے واضح کیا کہ 22اگست کو ترنول کے متعین شدہ مقام پر ہر صورت پاکستان تحریک انصاف جلسہ منعقد کرے گی، جو قانونی تقاضوں کے مطابق ہو رہا ہے۔
انہوں نے کہا کہ پاکستان تحریک انصاف ایک سیاسی پارٹی ہے، ہماری ایک سیاسی تحریک ہے۔ خبردار کہ جلسہ کی راہ میں رکاوٹیں پیدا کرنے کی کی کوششیں کی تو سخت مزاحمت ہوگی۔
یہ بھی پڑھیں: تحریک انصاف کا صوابی میں جلسہ، عمران خان نے اپنے خطاب میں کیا کہا؟
’جلسے کی اجازت دینے کا حکم عدالت نے دیا ہے۔ یہ اگر عدالت کے خلاف گئے تو پھر ہم بھی پیچھے ہٹنے والے نہیں ہیں۔ جلسہ کے لیے قافلوں کو خود لیڈ کروں گا اور میری گاڑی سب سے آگے ہوگی‘۔
انہوں نے کہا کہ مرکز میں بیٹھے نااہل ٹولے کی مفاد پرست پالیسیوں کی وجہ سے ملک میں معاشی تباہی آچکی ہے، حالات خراب سے خراب تر ہوتے جارہے ہیں۔ ہمیں بحیثیت قوم سوچنا ہے اور ملک کے مستقبل کو بچانے کے لیے اپنا کردار ادا کرنا ہے۔
