پیرس اولمپکس 2024 میں نیزہ پھینکنے کے مقابلوں میں پاکستان کے ارشد ندیم کو گولڈ میڈل جیتنے پر کروڑوں روپے کے نقد انعامات، بنگلے اور گاڑیاں ملی ہیں۔ دوسری طرف بھارتی کھلاڑی نیرج چوپڑا کو سلور میڈل جیتنے پر عجیب و غریب ملے ہیں۔
حال ہی میں نیرج چوپڑا نے ایک ٹی وی چینل کو انٹرویو کے دوران انکشاف کیا ہے کہ انھیں سلور میڈل جیتنے پر غیر روایتی تحائف ملے ہیں۔ انھوں نے یہ انکشاف تب کیا جب انٹرویو کے دوران پاکستانی ایتھلیٹ ارشد ندیم کا ذکر ہوا کہ انھیں سسر نے تحفے میں بھینس دی ہے۔
نیرج چوپڑا نے قہقہہ لگاتے ہوئے بتایا ’مجھے دیسی گھی تحفے میں دیا گیا تھا۔‘
وہ کہتے ہیں’جب ہم جیت کر ہریانہ میں اپنے گھر واپس جاتے ہیں تو ہمیں عجیب و غریب تحائف ملتے ہیں مثلاً 10 کلو دیسی گھی یا 50 کلو دیسی گھی۔ یا پھر لڈو۔‘
نیرج چوپڑا نے اس طرح کے تحائف کی ثقافتی اہمیت کے بارے میں وضاحت کرتے ہوئے کہا کہ اولمپکس 2024 سے پہلے ان کے ساتھ کچھ اس قسم کے وعدے کیے گئے تھے
‘اگر نیرج یہ مقابلہ جیتتا ہے، تو میں اسے 50 کلو گھی دوں گا۔‘
نیرج چوپڑا کہتے ہیں ’میں بچپن ہی سے اس طرح کے وعدے سنتا اور انعامات دیکھتا آ رہا ہوں، میں جس علاقے میں پلا بڑھا، وہاں سرکل کبڈی اور ریسلنگ بہت مشہور ہیں۔ اسی لیے وہاں گھی تحفے میں دیا جاتا ہے کیونکہ ہمارا ماننا ہے کہ یہ طاقت بڑھانے میں مدد کرتا ہے، جس کی ہمیں اپنے کھیل میں ضرورت ہوتی ہے۔ہمارے علاقے میں ایتھلیٹس کو بلٹ موٹر بائیکس، ٹریکٹرز اور بھینسیں تحفے میں دی جاتی ہیں۔
