کچے کے علاقے میں 12 پولیس اہلکاروں کی شہادت۔ وفاقی وزیر داخلہ محسن نقوی پولیس سے اظہار یکجہتی کے لیے پولیس لائنز رحیم یار خان پہنچ گئے۔ وزیر داخلہ نے پولیس لائنز رحیم یار خان میں شہید پولیس اہلکاروں کی نماز جنازہ میں شرکت اور ایصال ثواب کے لیے دعا اور فاتحہ خوانی بھی کی۔
مزید پڑھیں:کچے کے ڈاکوؤں کا پولیس پر حملہ ناقابل قبول، مریم نواز نے آپریشن کا اعلان کردیا
وزیر داخلہ محسن نقوی نے شہید پولیس اہلکاروں کو خراج عقیدت پیش کرتے ہوئے کہا کہ کچے میں شہید ہونے والے پولیس اہلکاروں نے عظیم مقصد کے لیے جانوں کا نذرانہ پیش کیا ہے۔ شہید پولیس اہلکاروں کی قربانی کو سلام پیش کرتے ہیں۔ شہدا ہمارے دلوں میں ہمیشہ زندہ رہیں گے۔
انسپکٹر جنرل پولیس پنجاب، ڈی جی رینجرز پنجاب، سیکریٹری داخلہ پنجاب، آر پی او بہاولپور، کمشنر بہاولپور، ڈی آئی جی سکھر، ڈی پی او رحیم یار خان، ڈپٹی کمشنر رحیم یار خان سمیت سول و عسکری حکام نے شہید پولیس اہلکاروں کی نماز جنازہ میں شرکت کی۔
