وفاقی حکومت نے 28 اگست کو ہونے والا پارلیمنٹ کا مشترکہ اجلاس ملتوی کردیا ہے۔
وزیر دفاع خواجہ آصف نے نجی ٹی وی کے پروگرام میں گفتگو کرتے ہوئے کہاکہ پارلیمنٹ کا مشترکہ اجلاس آئندہ ہفتے ہوگا۔
یہ بھی پڑھیں عدلیہ سے جیسے فیصلے آرہے ہیں آئینی ترمیم ملک کی ضرورت ہے، وفاقی وزیر مصدق ملک
واضح رہے کہ حکومت نے 28 اگست کو پارلیمنٹ کا مشترکہ اجلاس طلب کیا تھا، تاہم اب ملتوی کردیا گیا تھا، جس کی وجوہات نہیں بتائی گئیں۔
آج قومی اسمبلی کے اجلاس میں اسلام آباد میں بلدیاتی انتخابات ایکٹ کا ترمیمی بل کثرت رائے سے منظور کرلیا گیا۔
میڈیا پر خبریں زیرگردش ہیں کہ حکومت پارلیمنٹ کے مشترکہ اجلاس میں عدلیہ کے حوالے سے کوئی قانون سازی کرنا چاہتی ہے، تاہم گزشتہ روز وزیر اطلاعات عطااللہ تارڑ نے گفتگو کرتے ہوئے کہا تھا کہ عدلیہ کے حوالے سے کوئی قانون سازی زیر غور نہیں۔
کچھ روز قبل وفاقی وزیر پیٹرولیم مصدق ملک نے گفتگو کرتے ہوئے کہا تھا کہ عدلیہ سے جس طرح کے فیصلے آرہے ہیں، آئینی ترمیم ملک کی ضرورت ہے۔
یہ بھی پڑھیں آئینی ترمیم کا امکان: پارلیمنٹ میں اس وقت نمبر گیم کیا ہے؟
دوسری جانب آج چیئرمین پی ٹی آئی بیرسٹر گوہر نے کہاکہ ہم چیف جسٹس سمیت کسی بھی ایکسٹینشن کی مخالفت کریں گے۔
