وزیر اعلیٰ گلگت بلتستان حاجی گلبر خان کی یقین دہانی اور چارٹر آف ڈیمانڈ تسلیم کرنے پر گلگت ایئرپورٹ اراضی متاثرین نے دھرنا ختم کردیا تاہم احجتاجیوں نے ایک ماہ میں مسائل حل نہ ہونے کی صورت میں احتجاج دوبارہ شروع کرنے کا اعلان بھی کردیا۔
دھرنا 29 دن تک جاری رہنے والا تھا تاہم حکومت کی یقین دہانی کے بعد اسے ختم کردیا گیا۔
ایئرپورٹ کے باہر متاثرین نے کئی دنوں سے پرامن دھرنا دیا ہوا تھا جس میں سیاسی ،مذہبی،سماجی شخصیات کی ایک بڑی تعداد بھی شریک ہوتی رہی۔
یہ بھی پڑھیں: فلائٹ نمبر 404: گلگت سے اسلام آباد روانہ ہونے والا جہاز جو 35 سال بعد بھی لاپتا ہے
وزیر اعلیٰ گلگت بلتستان حاجی گلبر خان نے متاثرین ایئرپورٹ اراضی کے دھرنے سے خطاب کرتے ہوئے کہا کہ کا مسئلہ 70سالوں سے حل طلب ہے اور صوبائی حکومت نے اس مسئلے کوحل کرنے کے لیے وفاقی حکومت سے مختلف فورمز پر رابطہ کیا ہے۔
انہوں نے کہا کہ متاثرین کے جائز مطالبات کے حل کے لیے وفاقی حکومت کو خصوصی مراسلہ بھی بھیجا گیا۔ انہوں نے کہا کہ دھرنے میں موجود تمام متاثرین ہمارے بھائی ہیں اور ان کی مشکلات کا ہمیں احساس ہے۔
حاجی گلبر خان نے یقین دہانی کروائی کہ وزیر اعظم کے متوقع دورہ گلگت کے موقع پر متاثرین کی ملاقات کا بندوبست کیا جائے گا تاکہ آپ کے مطالبات حل ہوسکیں۔
مزید پڑھیے: گلگت بلتستان کے سابق وزیراعلیٰ خالد خورشید کے وارنٹ گرفتاری جاری
انہوں نے بتایا کہ وفاقی سطح پر بھی متاثرین ایئرپورٹ کے مسئلے کو حل کرنے کے لیے کمیٹی تشکیل دی گئی ہے جس میں صوبائی وزیر قانون اور سیکریٹری قانون بھی شامل ہیں۔
یاد رہے کہ متاثرین نے عدالتی احکامات پر عدم عمل درآمد کے بعد پلان بی کے تحت ایئر پورٹ مسافر لاؤنج کے باہر دھرنے کا اعلان کیا تھا جس پر مقامی انتظامیہ نے بھاری تعداد میں پولیس اور سیکیورٹی فورسز طلب کرلی تھی۔
تاہم اب طے ہوا ہے کہ صوبائی کابینہ متاثرین ایئرپورٹ کے معاوضے کے حوالے سے سمری بناکر منٹس آف میٹنگ کمشیر افیئرز کو ارسال کرے گی۔ متاثرین ائیرپورٹ نے دھرنا ایک ماہ تک کے لیے ملتوی کردیا۔
