ایف آئی اے کارپوریٹ کرائم سرکل کراچی نے ایک بڑی کارروائی کے دوران حوالہ ہنڈی اور غیر قانونی کرنسی ایکسچینج میں ملوث ملزم کو گرفتار کرلیا ہے، اور کروڑوں مالیت کی ملکی و غیر ملکی کرنسی برآمد کی ہے۔
ڈائریکٹر جنرل ایف آئی اے احمد اسحاق جہانگیر کی ہدایات پر حوالہ ہنڈی اور غیر قانونی کرنسی ایکسچینج میں ملوث عناصر کے خلاف کریک ڈاؤن کیا گیا۔
ملزم بہزاد عالم کو کراچی کے علاقے صدر سے گرفتار کیا گیا، ملزم غیر قانونی کرنسی ایکسچینج اور حوالہ ہنڈی میں ملوث تھا۔ ملزم کے خلاف کاروائی خفیہ اطلاع پر عمل میں لائی گئی۔
چھاپے کے دوران ملزم سے 10 کروڑ 24 لاکھ سے زائد پاکستانی روپے برآمد ہوئے جبکہ ملزم سے 51850 امریکی ڈالرز، 1500 آسٹریلین ڈالرز اور 250 درہم بھی برآمد ہوئے۔
ملزم بغیر لائسنس کرنسی کی غیر قانونی ایکسچینج میں ملوث ہے۔ ملزم برآمد ہونے والی کرنسی کے حوالے سے حکام کو مطمئن نہ کر سکا۔ واضح رہے کہ حوالہ ہنڈی سے قومی خزانے کو کروڑوں روپے کا نقصان ہو رہا تھا۔
ملزم کو گرفتار کر کے تفتیش کا آغاز کر دیا گیا ہے، جبکہ دیگر ملزمان کی گرفتاری کے لیے چھاپے مارے جا رہے ہیں۔
