جماعت اسلامی پاکستان کے امیر حافظ نعیم الرحمان نے کہا ہے کہ وزیر داخلہ کے منصورہ آنے یا نہ آنے سے ہمیں کوئی غرض نہیں، حکومت بجلی سستی کرے ورنہ پہیہ جام ہڑتال اور لانگ مارچ کریں گے، اس معاملے کو سیاست کی نذر نہیں ہونے دیں گے۔
میڈیا سے گفتگو کرتے ہوئے انہوں نے کہاکہ گزشتہ روز وزیر داخلہ نے فرمایا تھا کہ وہ منصورہ آکر حکومت اور جماعت اسلامی کے درمیان ہونے والے معاہدے پر پیشرفت سے آگاہ کریں گے، مگر اس پر کسی پریذینٹیشن کی ضرورت نہیں۔
یہ بھی پڑھیں تاجروں اور جماعت اسلامی کی شٹرڈاؤن ہڑتال، حکومت کا دباؤ میں نہ آنے کا فیصلہ
حافظ نعیم الرحمان نے کہاکہ حکومت نے ہم سے جو معاہدہ کیا تھا اس کو ایک ماہ ہوگیا ہے، ہم عوام کو ریلیف دلوا کر ہی رہیں گے۔
انہوں نے کہاکہ ملک میں کامیاب شٹر ڈاؤن ہڑتال کے بعد اب پہیہ جام اور لانگ مارچ کا آپشن بھی موجود ہے، جبکہ ہم ملک بھر میں ملین مارچ بھی کریں گے۔
واضح رہے کہ وزیر داخلہ محسن نقوی اور جماعت اسلامی کے نائب امیر لیاقت بلوچ کے درمیان ٹیلیفونک رابطہ ہوا تھا، جس میں محسن نقوی نے کہا تھا کہ حکومت جماعت اسلامی کے ساتھ ہونے والے معاہدے پر مکمل عملدرآمد چاہتی ہے، اور وہ منصورہ آکر جماعت اسلامی کو پیشرفت سے آگاہ کریں گے۔
یہ بھی پڑھیں حکومت اور جماعتِ اسلامی کے درمیان معاہدے میں کیا طے پایا؟
یہ بھی یاد رہے کہ جماعت اسلامی پاکستان نے جولائی میں راولپنڈی کے لیاقت باغ میں دھرنا دیا تھا جو 2 ہفتوں تک جاری رہا، اور اس دوران حکومت کے ساتھ ایک معاہدہ طے پایا تھا کہ 45 روز میں عوام کو بجلی کے بلوں میں ریلیف دیا جائے گا، تاہم ابھی تک حکومت کی جانب سے ایسے کسی ریلیف کا اعلان نہیں کیا گیا۔
