اسٹیٹ بینک کی مانیٹری پالیسی کمیٹی کا اجلاس آج ہوگا، جس میں نئی شرح سود کم یا زیادہ ہونے سے متعلق نیا پالیسی ریٹ دیا جائے گا، اسٹیٹ بینک کا موجودہ پالیسی ریٹ 19.50 فیصد ہے۔
مانیٹری پالیسی کمیٹی کے گزشتہ 2اجلاسوں میں شرح سود 2.50 فیصد کم کی گئی تھی۔ تاہم، ابھی بھی امکان ظاہر کیا جا رہا ہے کہ شرح سود میں مزید کمی کی جاسکتی ہے لیکن کیا اس کمی سے پاکستان میں گاڑیوں کی قیمتوں میں بھی کمی ہوجائے گی؟
پاکستان آٹومینیو فیکچررز ایسوسی ایشن کے اعداد و شمار کے مطابق جولائی کے مقابلے میں اگست میں گاڑیوں کی فروخت میں ایک فیصد اضافہ ہوا ہے، گزشتہ سال آٹو سیکٹر نے شدید مشکلات کا سامنا کیا ہے شرح سود میں اضافے کے باعث گاڑیوں کی خرید نہ ہونے کے برابر رہ گئی تھی اور کمپنیز کو اپنے یونٹس بند کرنے پڑگئے تھے۔
مزید پڑھیں: اسٹیٹ بینک کا شرح سود میں کمی کا اعلان، نئی مانیٹری پالیسی جاری
اس حوالے سے سابق چیئرمین پاکستان آٹو مینیوفیکچررز ایسوسی ایشن مشہود علی خان کا کہنا ہے کہ فوری طور پر ایسا ممکن نظر نہیں آتا، انکا کہنا تھا کہ جب تک شرح سود 10 فیصد یا اس سے بھی کم نہیں ہوجاتا انہیں بہتری کے امکانات کم نظر آرہے ہیں۔
انکا کہنا تھا کہ جب تک گاڑیاں خریدی نہیں جائیں گی تب تک انڈسٹری آگے نہیں بڑھ سکے گی، اور یہ تب ممکن ہوگا جب عام آدمی کی جیب اس کی اجازت دے گی۔
مشہود علی خان کا کہنا ہے کہ اس وقت اوسط آمدن کے شہری جو چھوٹی گاڑی خریدا کرتے تھے وہ گاڑی کی سلیب سے نکل چکے ہیں یا تو وہ پبلک ٹرانسپورٹ پرآگئے ہیں یا پھر موٹر سائیکل پر، اور اس وقت ماحول ایسا ہے کہ گاڑی کی پرانی یا نئی کمپنیز اپنی پراڈکٹس الیٹ کلاس کے لیے لانچ کر رہی ہیں۔
یہ بھی پڑھیں: اسٹیٹ بینک نے مانیٹری پالیسی جاری کردی، شرح سود 22 فیصد پر برقرار
مشہود علی خان کا کہنا ہے کہ پہلے تنخواہ دار طبقہ بینک کی طرف جاتا تھا اور قسطوں پر گاڑی لے لیتا تھا اب ماحوال یہ بن گیا ہے کہ شرح سود بڑھنے سے ایک گاڑی کی قیمت میں کم سے کم 10لاکھ روپے تک اضافہ ہوچکا ہے اور اس کے اثرات براہ راست محسوس بھی کیے جا رہے ہیں۔
