پاکستان ڈرامہ انڈسٹری کی سینیئر اداکارہ شگفتہ اعجاز کے شوہر یحییٰ صدیقی طویل علالت کے بعد انتقال کرگئے۔ اداکارہ نے شوہر کے انتقال کی خبر فوٹو اینڈ ویڈیو شیئرنگ ایپ انسٹاگرام کے ذریعے دی۔
شگفتہ اعجاز نے شوہر کی تصویر شیئر کرتے ہوئے لکھا کہ ان کے شوہر یحییٰ صدیقی خالق حقیقی سے جا ملے ہیں، انہوں نے مداحوں سے درخواست کی کہ ان کی مغفرت کے لیے سورۃ فاتحہ ضرور پڑھیں۔
View this post on Instagram
واضح رہے کہ اداکارہ شگفتہ اعجاز کے شوہر یحییٰ صدیقی 5 برسوں سے کینسر میں مبتلا تھے اور گزشتہ کئی دنوں سے اسپتال میں زیر علاج تھے۔
حال ہی میں اداکارہ نے اسپتال میں اپنے بیمار شوہر یحییٰ صدیقی کے ہمراہ شادی کی سالگرہ منائی تھی، اس موقع پر اداکارہ نے وی لاگ بھی بنایا تھا جو اُنہوں نے اپنے یوٹیوب چینل پر اپلوڈ کیا تھا۔
یہ بھی پڑھیں: بیمار شوہر کی خاطر دبئی جانے پر شگفتہ اعجاز پر غلیظ حملے
شگفتہ اعجاز نے اپنے وی لاگ میں کہا تھا کہ انہیں کئی ڈراموں کی آفر ہوئی لیکن شوہر کی خدمت کی وجہ سے انہوں نے ڈراموں میں کام کرنے سے انکار کر دیا کیونکہ ان کے لیے سب سے اہم ان کا خاندان ہے اور اس وقت ان کے شوہر بیمار ہیں انہیں ساتھ کی ضرورت ہے۔
شگفتہ اعجاز کا مزید کہنا تھا کہ انہوں نے گزشتہ کچھ عرصے میں اپنے پیاروں کو کھویا ہے اور اس جُدائی سے بہت کچھ سیکھا اور سمجھا ہے، اپنوں کو کھونے کا دُکھ ایسا ہے جو کبھی ختم نہیں ہوسکتا ہے۔
اداکارہ نے کہا کہ انہیں یہ دیکھ کر بہت سکون ملتا ہے کہ انہوں نے اپنے شوہر کی تیمارداری کی اور اُنہیں کسی بھی قسم کی تکلیف پہنچنے نہیں دی۔ بیماری اور موت کے بارے میں بات کرتے ہوئے ان کا مزید کہنا تھا کہ ہر انسان کا آخری انجام یہی ہے، سب نے ایک دن دُنیا سے چلے جانا ہے لیکن جانے سے پہلے ہونے والی بیماریاں بہت تکلیف دیتی ہیں۔
