آج علی الصبح ضلع کیماڑی پولیس کی حساس ادارے کے ہمراہ لیاری ندی کے پاس کاروائی کی تو گینگ وار کے کارندوں اور پولیس کے مابین فائرنگ کا تبادلہ ہوا۔ ایک زخمی ملزم سمیت 2 ملزمان کو گرفتار کرلیا، گرفتار ملزم نبیل لیاری گینگ وار جوجی گروپ کا کمانڈر ہے۔
ایس ایس پی کیماڑی کیپٹن (ر) فیضان علی کے مطابق ملزمان کی شناخت 1- نبیل (زخمی) ولد بشیر اور 2- نادر ولد بادل کے ناموں سے ہوئی ہے۔ گرفتار ملزمان کے قبضے سے غیرقانونی پستول اور 150 گرام چرس بھی برآمد ہوئی۔
مزید پڑھیں:کراچی میں خاتون کی تشدد زدہ لاش برآمد، شوہر گرفتار
ملزمان کے قبضے سے تھانہ شاہراہ فیصل کے مقدمہ 512/22 بجرم دفعہ 397/34 ت پ کی چھینی گئی سوزوکی 110 موٹرسائیکل بھی برآمد ہوئی۔ لیاری گینگ وار جوجی گروپ کا کمانڈر نبیل لیاری اور اولڈ گولیمار کے علاقوں میں منشیات نیٹ ورک کو بھی آپریٹ کرتا ہے۔
ملزم نبیل قتل، اقدام قتل اور منشیات فروشی کے مقدمات میں بھی پولیس کو مطلوب تھا۔ ملزمان کے خلاف تھانہ پاک کالونی میں مقدمات درج کر کے مزید تفتیش کی جا رہی ہے۔
