سندھ حکومت نے پولیو ورکرز کی سیکیورٹی میں غفلت کے الزام میں ڈپٹی کمشنر اور ایس ایس پی جیکب آباد کو عہدوں سے ہٹادیا ہے۔
ڈی آئی جی سکھر پیر محمد شاہ کے مطابق جیکب آباد میں مبینہ زيادتی کی شکار پولیو ورکر کو اس کے شوہر نے سیاہ کاری کا الزام لگا کر گھر سے نکال دیا ہے۔
پولیس نے مبینہ دھمکیاں دینے کے الزام میں خاتون کے شوہر اور دیور کو گرفتار کرلیا ہے۔ خاتون کو عدالت میں پیش کرکے شوہر اور سسرال سے تحفظ کے مچلکے جمع کرائے جائیں گے۔
مزید پڑھیں:جیکب آباد: خاتون پولیو ورکر سے مبینہ زیادتی، ملزمان تاحال مفرور
خاتون پولیو ورکر سے زیادتی کے خلاف سندھ دوست کمیٹی نے احتجاج ریکارڈ کرایا تھا اور شہیداللہ بخش پارک سے جیکب آباد پریس کلب تک احتجاجی ریلی بھی نکالی تھی۔
شرکا کا کہنا تھا کہ پولیو ورکر بچوں کو معذوری سے بچانے گھروں سے نکلتی ہیں، خاتون پولیو ورکر کے ساتھ جو واقعہ ہوا وہ انتہائی افسوسناک ہے۔ ضرورت کے وقت اس کا شوہر بھی اسے سہارا نہیں دے رہا، شرکا نے اعلیٰ حکام سے نوٹس لینے کا مطالبہ کیا ہے۔
یاد رہے کہ کچھ دنوں قبل جیکب آباد کے ایک گاؤں میں ایک شادی شدہ خاتون پولیو ورکر کو جنسی زیادتی کا نشانہ بنایا گیا تھا۔
