حکومت بلوچستان نے ملک میں پہلی مرتبہ ماہی گیروں کی کمیونٹی پولیسنگ کا تصور متعارف کرواتے ہوئے اس حوالے سے منصوبے کی منظوری دے دی۔
وزیراعلیٰ بلوچستان عبدالقدوس بزنجو نے محکمہ ماہی گیری وساحلی ترقی اور صوبے کے ماہی گیروں کی کمیونٹی کی بنیادوں پر میرین مانیٹرنگ اور پولیسنگ سے متعلق پروجیکٹ منظور کرلیا جس کے تحت آئی ٹی کے آلات فراہم کیے جائیں گے۔
اس اسکیم کو صوبہ اپنی سمندری حدود میں نافذ کرے گا جو ماہی گیروں کے مستقبل کے تحفظ کے لیے مددگار ثابت ہوگا اور یہ ایک مثالی کاوش بھی ہوگی کیوں کہ علاقائی پانیوں میں ماہی گیروں کی کمیونٹی پولیسنگ کا تصور ملک میں پہلی مرتبہ متعارف کیا جا رہا ہے۔
وزیراعلیٰ بلوچستان نے اس سے قبل بھی ماہی گیروں کے روزگار کے تحفظ کے لیے کئی اقدامات کیے ہیں۔ ان کا کہنا ہے کہ کم آمدن والے ماہی گیروں کے لیے فشرمین کالونی اور تمام ماہی گیروں کو صحت کارڈ کا اجرا کیا جارہا ہے جس سے ان کا معیار زندگی بلند ہو رہا ہے۔
انہوں نے کہا کہ ساحلی پٹی سے اور خصوصاً ماہی گیری سے وابستہ افراد کی زندگی میں نمایاں تبدیلی آرہی ہے اور صوبے کے ماہی گیر بلوچستان کی معیشت میں اپنا کلیدی کردار اب پہلے سے بہتر انداز میں ادا کر رہے ہیں۔