کراچی کے علاقے کلفٹن بلاک ون میں نظارت خانے میں آتشزدگی کے باعث 30 گاڑیاں مکمل طور پر جل گئیں۔
فائر بریگیڈ حکام کا کہنا ہے کہ آگ پر قابو پالیا گیا ہے، آگ لگنے کی وجہ معلوم نہیں ہوسکی۔ میڈیا رپورٹس کے مطابق، نظارت خانے میں 100 سے زائد سرکاری گاڑیاں کھڑی ہیں جن کی سیکیورٹی کے مناسب انتظامات نہیں کیے گئے، متعدد گاڑیوں کے پارٹس بھی غائب تھے، یہ سرکاری گاڑیاں حکومت سندھ کے مختلف محکموں کے زیراستعمال رہیں۔
یہ بھی پڑھیں: کراچی: غیرقانونی پیٹرول کی دکان پر آگ لگنے سے ایک شخص جاں بحق، رہائشی عمارت خاکستر
یاد رہے کہ کراچی کے نظارت خانوں میں آگ لگنے کے متعدد واقعات پیش آچکے ہیں۔ رواں برس مارچ میں بھی گلشن اقبال میں بھی نظارت خانے میں اچانک آگ بھڑک اٹھی تھی جس کے باعث متعدد گاڑیوں کو نقصان پہنچا تھا، اس واقعہ میں بھی آگ لگنے کی وجہ معلوم نہیں ہوسکی تھی۔ اس سے قبل 2022 میں بھی اسی نظارت خانے میں لگنے والی آگ میں 500 سے زائد موٹر سائیکلیں، بس، رکشے اور گاڑیاں جل کر خاک ہوگئی تھیں۔
واضح رہے کہ نظارت خانہ وہ جگہ ہوتی ہے جہاں کیس پراپرٹیز کا سامان مثلاً موٹرسائیکل، بس، ٹرک، گاڑیاں اور رکشے اور دیگر سامان لا کر رکھا جاتا ہے اور بوقت ضرورت اسے عدالت میں پیش کیا جاتا ہے۔
