وفاقی وزیر توانائی اویس لغاری نے کہا ہے کہ جماعت اسلامی نے بجلی سستی کرنے کا مطالبہ کیا تھا، تاہم ان سے کوئی رابطہ نہیں ہوا، اگلے سال تک 3 ڈسکوز کی نجکاری ہوجائے گی، اس حوالے سے گزشتہ 6 ماہ کے دوران بہت کام ہوا ہے۔
نجی ٹی وی کے پروگرام میں گفتگو کرتے ہوئے انہوں نے کہاکہ پاور سیکٹر میں اصلاحات کا عمل جاری ہے، اور سرکلر ڈیٹ میں کمی ہوئی ہے۔
یہ بھی پڑھیں مہنگی بجلی کے خلاف جماعت اسلامی کا چاروں صوبوں میں دھرنے کا اعلان
انہوں نے کہاکہ آئی پی پیز کے ساتھ گزشتہ 5 ماہ سے گفتگو ہورہی ہے، میں شروع سے یہی کہہ رہا ہوں کہ ہم ایک ایک پلانٹ کا تجزیہ کررہے ہیں۔
وزیر توانائی نے کہاکہ جن پلانٹس کی ضرورت نہیں، ان کے ساتھ گفتگو کا آغاز کیا ہے، آئی پی پیز سے اچھے ماحول میں گفتگو ہوئی ہے۔
اویس لغاری نے کہاکہ جولائی، اگست اور ستمبر میں ڈسٹری بیوشن کے نقصانات کم ہوئے ہیں، اور بہتری کی امید ہے۔
انہوں نے کہاکہ 3 کروڑ صارفین کو بجلی پر سبسڈی دی جارہی ہے، جماعت اسلامی نے بجلی کی قیمتیں کم کرنے کا کہا تھا، ان کے ساتھ ابھی کوئی رابطہ نہیں ہوا۔
انہوں نے کہاکہ کے الیکٹرک مہنگے داموں بجلی بنا رہی ہے، جس کا بوجھ ہم پر پڑ رہا ہے، امید ہے کہ اس بوجھ کو کم کیا جائے گا۔
واضح رہے کہ جماعت اسلامی نے بجلی کی قیمتوں میں کمی کے لیے راولپنڈی کے لیاقت باغ میں دھرنا دیا تھا، اور بعد ازاں حکومت کے ساتھ ایک معاہدہ طے پایا تھا کہ 45 روز کے اندر عوام کو بجلی کے بلوں میں ریلیف دیا جائے گا، لیکن معاہدے کا وقت ختم ہونے کے باوجود حکومت نے کوئی پیشرفت نہیں کی۔
یہ بھی پڑھیں وفاقی وزیر توانائی نے آئی پی پیز کے ساتھ معاہدوں میں تبدیلی کا امکان مسترد کردیا
اب جماعت اسلامی پاکستان کے امیر حافظ نعیم الرحمان نے کہا ہے کہ ہم اس معاملے پر خاموش نہیں بیٹھیں گے، 29 ستمبر کو ملک بھر میں احتجاج کیا جائے گا۔
