وفاقی وزیر خزانہ محمد اورنگزیب نے کہا ہے کہ آئی ایم ایف کی جانب سے بیل آؤٹ پیکج کی منظوری موجودہ حکومت کی پالیسیوں کی توثیق ہے۔
نجی ٹی وی سے گفتگو کرتے ہوئے انہوں نے کہاکہ آئی ایم ایف نے اگلے 3 سال کے لیے قرض پروگرام کی منظوری دی ہے، ہم اعتماد کرنے پر عالمی مالیاتی ادارے کے شکر گزار ہیں۔
یہ بھی پڑھیں آئی ایم ایف نے پاکستان کے لیے 7 ارب ڈالر کے بیل آؤٹ پیکج کی منظوری دیدی
محمد اورنگزیب نے کہاکہ آئی ایم ایف پروگرام کا مقصد میکرو اکنامک استحکام حاصل کرنا ہے، مہنگائی کم اور شرح سود بھی نیچے آرہی ہے۔
انہوں نے کہاکہ بین الاقوامی اداروں نے ہم پر اعتماد کیا ہے، اب ہماری کرنسی مستحکم اور زرمبادلہ کے ذخائر بھی بڑھ گئے ہیں۔
وزیر خزانہ نے کہاکہ ریٹنگ ایجنسیوں نے پاکستان کی ریٹنگ بڑھائی ہے، اب مہنگائی میں کمی کا عام آدمی پر اثر آنا شروع ہوگیا ہے۔
محمد اورنگزیب نے کہاکہ ہم ڈھانچہ جاتی اصلاحات کے لیے پرعزم ہیں، اگر ہم چاہتے ہیں کہ یہ آئی ایم ایف کا آخری پروگرام ہو تو اس کے لیے ڈھانچہ جاتی اصلاحات کرنا ہوں گی۔
انہوں نے کہاکہ ماضی میں جو ہوگیا وہ ہوگیا، اب ہمیں ہمیں ماضی بھول کر مثبت انداز میں آگے بڑھنا چاہیے۔
یہ بھی پڑھیں معیشت کے اشاریے اچھے ہیں، حکومت کے بدترین مخالف نے بھی اعتراف کرلیا
واضح رہے کہ عالمی مالیاتی فنڈ (آئی ایم ایف) نے پاکستان کے لیے 7 ارب ڈالر کے بیل آؤٹ پیکج کی منظوری دے دی ہے۔
وزیراعظم پاکستان شہباز شریف نے بھی آئی ایم ایف سے معاہدے پر اطمینان کا اظہار کرتے ہوئے کہاکہ اگر ہماری محنت جاری رہی تو یہ آئی ایم ایف کا آخری پروگرام ہوگا۔
