قومی اسمبلی کے آج ہونے والے اجلاس میں پیپلز پارٹی کی رہنما ناز بلوچ کی جانب سے مسجد اقصیٰ میں اسرائیلی جارحیت کے خلاف قرارداد پیش کی گئی جسے متفقہ طور پر منظور کر لیا گیا۔
تفصیلات کے مطابق اسپیکر قومی اسمبلی راجہ پرویز اشرف کی زیر صدارت قومی اسمبلی کا اجلاس ہوا جس میں پیپلز پارٹی کی رہنما ناز بلوچ کی جانب سے مسجداقصیٰ میں اسرائیلی جارحیت کے خلاف قرارداد پیش کی گئی۔
قومی اسمبلی نے مسجداقصیٰ میں حملے کی شدید مزمت کرتے ہوئے اسرائیلی جارحیت کے خلاف متفقہ طور قرارداد منظور کی ہے۔
قومی اسمبلی میں منظور کی گئی قراردار میں عالمی برادری سے اسرائیلی حملے رکوانے کا مطالبہ کیا گیا۔ قراردار میں اسرائیلی حلمہ کو بدترین دیشت گردی قرار دیا گیا ہے۔
یاد رہے کہ اسرائیلی سیکیورٹی فورسز نے بدھ کے روز طلوع آفتاب کے وقت مسجد اقصیٰ کے احاطے میں نمازیوں کو بدترین تشدد کا نشانہ بنایا جس کے نتیجے میں متعدد فلسطینی زخمی ہوگئے جبکہ سیکڑوں افراد کو گرفتار کرلیا گیا۔ دوسری طرف اسرائیلی پولیس نے دعویٰ کیا ہے کہ پولیس نے بدھ کے روز فسادات کے نتیجے میں جوابی کارروائی کرتے ہوئے حملہ کیا۔
غیر ملکی خبر رساں اداروں کے مطابق مشتعل فلسطینیوں کی اسرائیلی فورسز کے ساتھ جھڑپیں ہوئیں جس کے نتیجے میں کئی فلسطینی زخمی ہوگئے۔ اسرائیلی پولیس نے نہتے نمازیوں پر دستی بم پھینکے اور آنسو گیس کی شیلنگ کی جس سے متعدد نمازیوں کی حالت غیر ہوگئی تھی۔