حکومت پنجاب نے سیکیورٹی خطرات کے پیش نظر 4 شہروں میں دفعہ 144 نافذ کرکے رینجرز کو طلب کرلیا ہے اور اس حوالے سے نوٹیفکیشن بھی جاری کردیے گئے ہیں۔
ترجمان محکمہ داخلہ پنجاب کے مطابق، لاہور، راولپنڈی، اٹک اور سرگودھا میں دفعہ 144 نافذ کردی گئی ہے، جبکہ لاہور، راولپنڈی اور اٹک میں رینجرز کو بھی طلب کرلیا ہے۔ ترجمان کے مطابق، پنجاب میں ہر قسم کے سیاسی اجتماعات، دھرنے، جلسے، مظاہرے، احتجاج اور ایسی تمام سرگرمیوں پر پابندی عائد ہے، راولپنڈی اور اٹک میں 4 اور 5 اکتوبر کے لیے رینجرز کی 6 کمپنیوں کی خدمات طلب کی گئی ہیں، اٹک میں فرنٹیئر کانسٹیبلری کی 10 پلاٹون بھی تعینات کرنے کی سفارش کی گئی ہے۔
یہ بھی پڑھیں: کیا پورے پنجاب میں دفعہ 144 لگنے جارہی ہے؟
لاہور میں 5 اکتوبر کے لیے رینجرز کی 3 کمپنیوں کی خدمات طلب کی گئی ہیں۔ انہوں نے بتایا کہ راولپنڈی، اٹک اور سرگودھا میں 3 دن کے لیے دفعہ 144 نافذ کی ہے جس کا اطلاق جمعہ 4 اکتوبر سے اتوار 6 اکتوبر تک ہوگا۔ لاہور میں جمعرات 3 اکتوبر سے منگل 8 اکتوبر تک دفعہ 144 نافذ ہے، لاہور، راولپنڈی، اٹک اور سرگودھا میں پابندی کا فیصلہ ضلعی انتظامیہ کی سفارش پر کیا گیا ہے۔
ترجمان محکمہ داخلہ نے اپنے بیان میں کہا ہے کہ سیکیورٹی خطرات کے پیش نظر کوئی بھی عوامی اجتماع دہشتگردوں کے لیے سوفٹ ٹارگٹ ہوسکتا ہے، امن و امان کے قیام، انسانی جانوں اور املاک کے تحفظ کے لیے احکامات جاری کیے گئے ہیں، محکمہ داخلہ نے دفعہ 144 کے نفاذ کے نوٹیفکیشن جاری کردیے ہیں، رینجرز کی خدمات کے لیے وفاقی وزارت داخلہ کو مراسلے لکھے گئے تھے۔
یہ بھی پڑھیں: اسلام آباد جلسہ ہوکر رہے گا، کل دفعہ 144 کے ٹکڑے کرکے دفعہ 804 لگائیں گے، عامر مغل
واضح رہے کہ گزشتہ روز حکومت پنجاب نے لاہور میں 6 روز کے لیے دفعہ 144 نافذ کرنے کا نوٹیفکیشن جاری کیا تھا۔ قبل ازیں، حکومت پنجاب نے یکم اکتوبر کو فیصل آباد اور بہاولپور میں ہر قسم کے سیاسی اجتماعات، دھرنے، جلسے، مظاہرے، احتجاج اور ایسی تمام سرگرمیوں پر پابندی عائد کرتے ہوئے 2 روز کے لیے دفعہ 144 نافذ کی تھی۔
