بلوچستان کے ضلع ہرنائی کے علاقے کھوسٹ قلعہ سے 600 میٹر کی مسافت پر جمعہ کی صبح دو بارودی سرنگوں کے دھماکے ہوئے۔ لیویز حکام کے مطابق دھماکے کے نتیجے میں ایک مزدور جاں بحق ہوگیا۔
واقعہ کے بعد سیکیورٹی فورسز اور امدادی ٹیمیں جائے وقوعہ پر پہنچیں جہاں سے جاں بحق مزدور کی لاش کو قریبی ڈی ایچ کیو ہسپتال منتقل کیا گیا۔ ہسپتال میں جاں بحق مزدور کی شناخت عثمان خان ولد مراد خان کی نام سے ہوئی ہے۔ جس کی عمر 26 سے 27 سال بتائی جا رہی ہے۔
جاں بحق ہونیوالے مزدور کا تعلق بلوچستان کے علاقے ژوب سے ہے۔ لاش کو ضروری کارروائی کے بعد آبائی علاقے روانہ کر دیا گیا ہے۔ سیکیورٹی فورسز کی جانب سے دھماکوں کی جگہ سے شواہد اکٹھے کرنے کا سلسلہ جاری ہے۔
