کراچی کے علاقے منگھوپیر خیرآباد گلشن حدید میں پولیس مقابلے کے دوران 5 ڈاکو ہلاک ہوگئے۔ پولیس کے مطابق خفیہ اطلاع پر آپریشن کیا گیا، علاقے کی ناکہ بندی کے دوران فائرنگ کا تبادلہ ہوا جس کے نتیجے میں 5ڈاکو ہلاک ہوئے۔
ایس ایس پی ویسٹ طارق مستوئی نے بتایا کہ منگھوپیر کے علاقے میں سرچ آپریشن جاری تھا کہ اس دوران خفیہ اطلاع موصول ہوئی کہ 2 موٹرسائیکلوں پر ڈاکو علاقے میں موجود ہیں۔
مزید پڑھیں: کراچی پولیس کی کارروائی، بھارتی جاسوس اسلحہ سمیت گرفتار
انہوں نے بتایا کہ علاقے کی ناکہ بندی اور سرچ آپریشن کے دوران ڈاکوؤں نے فائرنگ شروع کردی، تو تبادلے میں 5ڈاکو ہلاک ہوئے اور ان کے قبضے سے اسلحہ اور دیگر سامان بھی برآمد کرلیا گیا۔
طارق مستوئی نے بتایا کہ علاقہ مکین ڈاکوؤں کے گینگ سے کئی روز سے پریشان تھے، علاقہ مکینوں کے ساتھ مل کر آپریشن کیا گیا، خیرآباد کے علاقے میں ڈاکو داخل ہوئے تو پولیس نے گھیرلیا۔
پولیس کے مطابق ڈاکوؤں کو عباسی شہید اسپتال منتقل کیا گیا۔ ہلاک ہونے والے ڈاکوؤں کی شناخت تاحال نہ ہوسکی۔ ہلاک ہونے والے 5ڈاکوؤں کے قبضے سے اسلحہ، موٹر سائیکل اور دیگر سامان بھی برآمد ہوا ہے۔
یہ بھی پڑھیں: کراچی پولیس کی بڑی کارروائی، لیاری گینگ وار جوجی گروپ کا کمانڈر گرفتار
واضح رہے پولیس نے خفیہ اطلاع پر علاقہ مکینوں کے ساتھ مل کر آپریشن کیا، علاقہ مکین کئی روز سے پریشان تھے اور پولیس کو ان کی کارروائیوں کا علم تھا کیونکہ ڈاکوؤں کا گروہ علاقے میں متعدد گھر لوٹ چکا ہے۔
